ریفری کو ہٹانے کے سوا کوئی چارہ نہیں، پی سی بی نے آئی سی سی کو ایک اور خط لکھ دیا

لاہور: ایشیا کپ میں میچ ریفری اینڈی پائکرافٹ کا تنازع شدت اختیار کر گیا اور پاکستان کے سخت موقف کے بعد آئی سی سی کے پاس متنازع میچ ریفری کو ہٹانے کے علاوہ کوئی دوسرا راستہ نہیں بچا۔ذرائع کے مطابق پی سی بی نے میچ ریفری کی تبدیلی کا مطالبہ تسلیم نہ کرنے پر آئی سی سی کو دوبارہ خط لکھ دیا۔ جوابی خط میں پی سی بی نے بھی سخت موقف اپناتے ہوئے میچ ریفری اینڈی پائکرافٹ کے خلاف کارروائی نہ کرنے کے فیصلے کو مسترد کردیا۔ذرائع نے بتایا ہے کہ جوابی خط میں پاکستان نے اینڈی پائی کرافٹ کی زیر نگرانی ہونے والے میچ میں کھیلنے سے انکار کردیا اور مطالبہ تسلیم نہ ہونے پر بائیکاٹ کے موقف پر اصرار کیا۔ذرائع کا کہنا ہے کہ پاکستان نے بھی متنازع امپائر کے خلاف آئی سی سی کی انکوائری کو ایک رسمی کارروائی قرار دیتے ہوئے کہا کہ انکوائری کے لیے تمام پہلوؤں کا جائزہ نہیں لیا گیا اور نہ ہی متعلقہ لوگوں سے رابطہ کیا گیا۔ذرائع کے مطابق پاکستان نے تمام تحفظات دور کرنے پر اصرار کیا ہے اور کہا ہے کہ پاکستان تمام تحفظات دور ہونے کے بعد کھیلنے پر رضامند ہو گا اور مطالبہ تسلیم کرنے کا باضابطہ اعلان کر دیا جائے گا۔پی سی بی ذرائع کا کہنا ہے کہ پاکستان کے سخت موقف کے بعد آئی سی سی کی مشکلات میں اضافہ ہوگیا ہے اور میچ ریفری کے حوالے سے جلد باضابطہ اعلان متوقع ہے۔ پاکستان کے سخت موقف کے بعد آئی سی سی کے پاس پاکستانی میچوں سے امپائر کو ہٹانے کے سوا کوئی چارہ نہیں۔