ایشیا کپ: اینڈی پائکرافٹ میچ ریفری رہیں گے، پاکستان کی درخواست مسترد

لاہور: انٹرنیشنل کرکٹ کونسل (آئی سی سی) نے میچ ریفری اینڈی پائی کرافٹ کو ہٹانے کی پاکستان کی درخواست مسترد کر دی، اس حوالے سے پاکستان کرکٹ بورڈ (پی سی بی) کو بھی آگاہ کر دیا گیا ہے۔آئی سی سی نے پاکستان کے اس مؤقف کو بھی قبول نہیں کیا کہ میچ ریفری نے بھارتی ٹیم کے دباؤ میں ایک متنازعہ قدم اٹھایا، اور یہ گراؤنڈ پر موجود ایشین کرکٹ کونسل کے رکن تھے جنہوں نے پائکرافٹ سے کہا کہ وہ ’’مصافحہ‘‘ نہ کریں۔میڈیا رپورٹس کے مطابق پائی کرافٹ کو پورے ایشیا کپ سے ہٹانے کے بجائے انہیں صرف پاکستان کے میچوں سے ہٹانے پر غور کیا جا رہا ہے اور ان میچوں میں سابق ویسٹ انڈین کرکٹر رچی رچرڈسن کو میچ ریفری مقرر کیے جانے کا امکان ہے۔دوسری جانب پاکستان کرکٹ بورڈ (پی سی بی) کی جانب سے مستقبل کے لائحہ عمل کا فیصلہ کرنے کے لیے حکومت سے مشاورت متوقع ہے اور اس حوالے سے اہم اجلاس بھی طلب کر لیا گیا ہے۔ذرائع کے مطابق پی سی بی ایشیا کپ میں پاکستان کرکٹ ٹیم کے میچز کا فیصلہ اعلیٰ حکام سے مشاورت کے بعد کرے گا۔یاد رہے کہ میچ ریفری اینڈی پائی کرافٹ نے کپتان سلمان آغا کو پاک بھارت میچ کے دوران مصافحہ کرنے سے منع کیا تھا۔