فلسطین اور کشمیر جیسے تنازعات سے امن کو خطرہ ہے، اسحاق ڈار

اسلام آباد: نائب وزیراعظم و وزیر خارجہ اسحاق ڈار نے کہا ہے کہ کشمیر اور فلسطین جیسے تنازعات سے امن کو خطرہ ہے، پاکستان نے ہمیشہ تنازعات کو پرامن طریقے سے حل کرنے پر زور دیا ہے۔اسلام آباد میں کانفرنس سے خطاب کرتے ہوئے وزیر خارجہ کا کہنا تھا کہ امن، استحکام اور ترقی کا آپس میں گہرا تعلق ہے، پارلیمانی سفارت کاری مذاکرات میں اہم کردار ادا کر سکتی ہے، پارلیمانی سفارت کاری باہمی احترام کو فروغ دے سکتی ہے۔انہوں نے کہا کہ پاکستان کو موسمیاتی تبدیلی جیسے سنگین چیلنجز کا سامنا ہے، دنیا کو آج عدم استحکام، بحران اور جنگوں کا سامنا ہے، پارلیمانی رہنماؤں کے درمیان رابطوں اور تبادلوں کو فروغ دینا وقت کی اہم ضرورت ہے۔اسحاق ڈار کا مزید کہنا تھا کہ علاقائی امن واستحکام کے لیے مل کر کام کرنے کی ضرورت ہے، ماحولیاتی انصاف کے لیے سب کو مل کر آواز اٹھانا ہو گی، پاکستان موسمیاتی تبدیلی سے متاثرہ 10 ممالک میں شامل ہے جب کہ موسمیاتی تبدیلیوں میں پاکستان کا حصہ ایک فیصد بھی نہیں ہے۔نائب وزیراعظم نے کانفرنس کے شرکاء سے کہا کہ عالمی اقتصادی نظام میں اصلاحات کی ضرورت ہے۔