سٹاک ایکسچینج میں انڈیکس 151,703 کی سطح پر پہنچ گیا

کراچی: پاکستان اسٹاک ایکسچینج میں مسلسل دوسرے روز زبردست تیزی دیکھی جارہی ہے جہاں 100 انڈیکس تاریخ کی نئی بلند ترین سطح پر پہنچ گیا۔ گزشتہ روز 100 انڈیکس 1,004 پوائنٹس کے اضافے کے بعد 150,975 پر بند ہوا تھا جبکہ آج کی ٹریڈنگ میں یہ انڈیکس مزید 728 پوائنٹس اضافے کے بعد 151,703 کی سطح پر پہنچ گیا۔ ایک موقع پر انڈیکس میں 1,560 پوائنٹس کی غیر معمولی تیزی بھی ریکارڈ کی گئی اور 100 انڈیکس 152,535 کی نئی بلند ترین سطح پر پہنچ گیا۔ مارکیٹ کے اعداد و شمار کے مطابق گزشتہ روز تجارتی سرگرمیوں کے دوران 44.42 ارب روپے میں 1.08 ارب حصص کا کاروبار ہوا۔ اسی طرح مارکیٹ کیپٹلائزیشن میں 54 ارب روپے کا اضافہ ہوا جس کے بعد اس کی کل مالیت 17,855 ارب روپے ہو گئی۔ معاشی ماہرین کے مطابق اسٹاک مارکیٹ میں حالیہ تیزی سرمایہ کاروں کے بڑھتے ہوئے اعتماد کی عکاس ہے جب کہ رواں ہفتے یہ دوسرا دن ہے جب انڈیکس میں ایک ہزار سے زائد پوائنٹس کا اضافہ ریکارڈ کیا گیا۔