انتہا پسندی اور دہشت گردی کے خلاف جنگ میں افواج کی حمایت جاری رکھیں گے، بلاول

اسلام آباد: پاکستان پیپلز پارٹی کے چیئرمین بلاول بھٹو زرداری نے کہا ہے کہ انتہا پسندی اور دہشت گردی کے خلاف جنگ میں سیکیورٹی فورسز کی غیر متزلزل حمایت جاری رکھیں گے۔ بنوں میں ایف سی ہیڈ کوارٹر پر حملے اور لکی مروت میں پولیس اہلکاروں پر فائرنگ کی شدید مذمت کرتے ہوئے بلاول بھٹو نے دہشت گرد حملے کو ناکام بنانے میں ایف سی اہلکاروں کے عزم اور جذبے کو خراج تحسین پیش کیا۔ بلاول بھٹو نے دہشت گردوں کے ساتھ فائرنگ کے تبادلے میں شہید ہونے والے سیکیورٹی اہلکاروں اور لکی مروت میں شہید ہونے والے پولیس اہلکاروں کو خراج عقیدت پیش کرتے ہوئے ان کے اہل خانہ سے دلی تعزیت اور یکجہتی کا اظہار کیا۔ انہوں نے دہشت گرد حملے میں زخمی ہونے والے اہلکاروں اور شہریوں کی جلد صحت یابی کے لیے بھی دعا کی۔ اس موقع پر پی پی پی چیئرمین نے انتہا پسندی اور دہشت گردی کے خلاف جنگ میں سیکیورٹی فورسز کی غیر متزلزل حمایت جاری رکھنے کے عزم کا اعادہ کیا۔ بلاول بھٹو زرداری نے کوئٹہ میں بلوچستان نیشنل پارٹی (مینگل) کے جلسے میں دھماکے کی بھی مذمت کی، انہوں نے کہا کہ دھماکے کے نتیجے میں قیمتی جانوں کے ضیاع پر افسوس کا اظہار کرتے ہوئے متاثرہ خاندانوں اور بی این پی (ایم) کی قیادت سے اظہار تعزیت کرتے ہیں۔ انہوں نے کہا کہ انہیں یقین ہے کہ اس گھناؤنے جرم میں ملوث دہشت گردوں کو جلد انصاف کے کٹہرے میں لایا جائے گا۔ انہوں نے بلوچستان حکومت سے اپیل کی کہ واقعے میں زخمی ہونے والے شہریوں کے علاج معالجے کو ہر صورت یقینی بنایا جائے۔