ڈیمز پر وزیراعلیٰ کے پی کی بات خوش آئند ہے، عظمیٰ بخاری

لاہور: وزیراطلاعات وثقافت عظمیٰ بخاری کا کہنا ہے کہ پنجاب میں اس وقت سیلاب کی وجہ سے صورتحال بہت سنگین ہے، اس لیے سوشل میڈیا کی خبروں پر نہ جائیں، سرکاری خبر نہ ہو تو اسے نہ پھیلائیں۔ ڈی جی پی آر لاہور میں پریس کانفرنس کرتے ہوئے وزیر اطلاعات نے کہا کہ پروپیگنڈہ کرکے انتشار پھیلانے والی مخلوق میں نہ خدا کا خوف ہے اور نہ ہی پاکستانیت، کھانا دینے سے منع نہیں کیا، فسادی جماعت کے پاس کوئی امدادی کام نہیں، وہ ہمیشہ سڑکوں سے چندہ لیتے ہیں، انہیں نہیں معلوم کہ لوگ ڈوب گئے، یہ صرف پروپیگنڈا کررہے ہیں۔ انہوں نے کہا کہ کھانا ٹیسٹ کر کے سیلاب سے متاثرہ افراد کو دیا جائے، اس پر بھی سیاست کی جا رہی ہے، اس سے پہلے بھی لوگ زہریلا کھانا کھا کر متاثر ہوتے تھے، یہ پنجاب کے عوام کو ریلیف دینے کا کام نہیں کر رہا۔ اس وقت عوام دیکھ رہے ہیں کہ کون ان کے ساتھ کھڑا ہے اور کون پروپیگنڈا کر رہا ہے۔ عظمیٰ بخاری نے کہا کہ میں کالاباغ ڈیم پر علی امین گنڈا پور کے بیان سے پہلی بار متفق ہوں، قومی سطح پر نیشنل ایکشن پلان یا بہترین حکمت عملی بنانے کی ضرورت ہے۔ مریم نواز ان ڈیمز پر کام کرنے کے لیے پرعزم ہیں، سندھ میں سیلاب آیا تو ہمیں نقصان ہوگا، اس لیے ہمیں بیٹھ کر فیصلہ کرنا ہوگا کیونکہ ڈیمز ناگزیر ہیں۔ وزیراطلاعات نے کہا کہ پیپلز پارٹی کو خط لکھنے سے بہتر ہے، مریم نواز ان کے مشورے کے بغیر بھی اچھا کام کر رہی ہیں، کچے کے ڈاکو سمیت سب کی جان اہم ہے، وہ باہر نکل کر ہتھیار ڈال دیں تو انہیں تمام سہولیات ملیں گی۔