بھارت سیلاب کے ذریعے پاکستان کو نقصان پہنچاسکتا ہے، سابق بھارتی جنرل

نئی دہلی: بھارتی فوج کے ریٹائرڈ لیفٹیننٹ جنرل کنولجیت سنگھ نے انکشاف کیا ہے کہ بھارت پاکستان کو نقصان پہنچانے کے لیے پانی کو بطور ہتھیار استعمال کر سکتا ہے۔ ایکس پر ان کا انٹرویو کلپ وائرل ہوا ہے جس میں جنرل ریٹائرڈ کنولجیت سنگھ نے کہا کہ بھارت کے پاس پانی روکنے اور چھوڑنے کی پوری صلاحیت ہے۔ بھارت اچانک پانی روک کر پاکستان کی طرف چھوڑ دے گا جس سے سیلاب آئے گا اور پاکستان اس پانی کو سنبھال نہیں سکے گا۔ ان کا مزید کہنا تھا کہ بھارت فصل کے موسم میں پانی روک سکتا ہے اور بارش کے موسم میں پانی کی ضرورت نہ ہونے پر چھوڑ سکتا ہے، تاکہ پاکستان کو زیادہ نقصان پہنچایا جا سکے۔ کنولجیت سنگھ نے کہا کہ سندھ طاس معاہدہ بین الاقوامی نہیں بلکہ دوطرفہ معاہدہ ہے اس لیے بھارت اپنی مرضی سے پانی روکنے یا چھوڑنے کا فیصلہ کرسکتا ہے۔ واضح رہے کہ گزشتہ دنوں بھارت نے دریائے راوی، جہلم، ستلج اور چناب میں پانی چھوڑا جس سے پاکستان میں غیر معمولی سیلابی صورتحال پیدا ہوگئی، درجنوں افراد لقمہ اجل بن گئے۔ لوگ مارے گئے، کھیت تباہ ہوئے، اور گھروں کو نقصان پہنچا۔