راولپنڈی: گلگت بلتستان کے ضلع دیامر کے علاقے چلاس میں پاک فوج کا ہیلی کاپٹر گر کر تباہ ہوگیا، حادثے میں 2 میجرز سمیت 5 اہلکار شہید ہوگئے۔پاک فوج کے شعبہ تعلقات عامہ (آئی ایس پی آر) کے مطابق پاک فوج کا ایم آئی 17 ہیلی کاپٹر تربیتی پرواز کے دوران گاؤں ہڈور کے قریب گر کر تباہ ہوگیا۔ حادثہ صبح تقریباً 10 بجے پیش آیا۔ ہیلی کاپٹر ٹھک داس چھاؤنی سے تقریباً 12 کلومیٹر دور کریش لینڈنگ کے بعد گر کر تباہ ہو گیا۔آئی ایس پی آر کا کہنا ہے کہ ہیلی کاپٹر میں سوار تمام عملہ شہید ہوگیا۔ شہید ہونے والوں میں پائلٹ ان کمانڈر میجر عاطف، کو پائلٹ میجر فیصل، فلائٹ انجینئر نائب صوبیدار مقبول، کریو چیف حوالدار جہانگیر اور کریو چیف نائیک عامر شامل ہیں۔ترجمان پاک فوج کے مطابق ہیلی کاپٹر معمول کی تربیتی پرواز پر تھا کہ فنی خرابی پیدا ہوگئی۔ ہر وقت آپریشنل تیاری کو یقینی بنانے کے لیے آرمی ایوی ایشن کی تربیتی پروازیں معمول کا حصہ ہیں۔آئی ایس پی آر نے کہا کہ یہ تربیت دفاعی ذمہ داریوں کے ساتھ ساتھ انسانی امداد اور بحالی کے مشن کے لیے بھی ناگزیر ہے۔ ملکی دفاع اور عوامی خدمت کے ہر شعبے میں بھرپور تیاری کو یقینی بنایا جائے گا۔
0%
Leave a Comment