راولپنڈی: سیکیورٹی فورسز نے خیبرپختونخوا میں دو مختلف کارروائیوں کے دوران بھارتی حمایت یافتہ فتنہ الخوارج کے 31 دہشت گردوں کو ہلاک کردیا۔انٹر سروسز پبلک ریلیشنز (آئی ایس پی آر) کے مطابق سیکیورٹی فورسز نے انٹیلی جنس ان پٹس پر 13 اور 14 ستمبر کو لکی مروت اور بنوں میں آپریشن کیا۔ سیکیورٹی فورسز نے لکی مروت میں انٹیلی جنس کی بنیاد پر آپریشن کیا اور خوارج کے ٹھکانے کو مؤثر طریقے سے نشانہ بنایا۔لکی مروت میں دہشت گردوں کے ساتھ شدید فائرنگ کے تبادلے کے بعد خوارج کے 14 بھارتی پراکسی مارے گئے۔آئی ایس پی آر کے مطابق سیکیورٹی فورسز نے بنوں میں انٹیلی جنس کی بنیاد پر ایک اور آپریشن کیا، فائرنگ کے تبادلے میں مزید 17 خوارج مارے گئے۔پاک فوج کے ترجمان کا کہنا تھا کہ علاقے میں پائے جانے والے ہندوستانی سرپرستی میں خوارج کے خاتمے کے لیے کلیئرنس آپریشن جاری ہے، اور سیکیورٹی فورسز ملک سے ہندوستانی اسپانسر شدہ دہشت گردی کی لعنت کو ختم کرنے کے لیے پرعزم ہیں۔واضح رہے کہ خیبرپختونخوا میں سیکیورٹی فورسز نے 10 سے 13 ستمبر تک دو مختلف کارروائیوں میں بھارتی پراکسی فتنہ الخوارج کے 35 دہشت گردوں کو ہلاک کردیا تھا تاہم فائرنگ کے شدید تبادلے میں ملک کے 7 بہادر بیٹوں نے معصوم شہریوں کو بچاتے ہوئے جام شہادت نوش کیا۔ یہ شہری بھارتی حمایت یافتہ خوارج کے ہاتھوں یرغمال بنے ہوئے تھے۔وفاقی وزیر داخلہ محسن نقوی نے خیبرپختونخوا میں بھارتی سرپرستی میں دہشت گردوں کے خلاف کامیاب آپریشنز پر سیکیورٹی فورسز کی صلاحیتوں کو سراہتے ہوئے کہا کہ فورسز نے بروقت کارروائی کرکے بھارتی سرپرستی میں دہشت گردوں کے مذموم عزائم کو ناکام بنایا۔انہوں نے کہا کہ قوم بھارتی حمایت یافتہ دہشت گردوں کے خاتمے کے لیے سیکورٹی فورسز کے ساتھ کندھے سے کندھا ملا کر کھڑی ہے اور فتنہ الہند کے دہشت گردوں کو پاکستان میں چھپنے کی اجازت نہیں دی جائے گی۔
0%
Leave a Comment