پی ٹی آئی ارکان قومی اسمبلی کے بعد سینیٹ کی قائمہ کمیٹیوں سے بھی مستعفی ہوگئے

اسلام آباد: پاکستان تحریک انصاف کے بانی چیئرمین عمران خان کی ہدایت پر پارٹی اراکین قومی اسمبلی کی قائمہ کمیٹیوں سے مستعفی ہونے کے بعد سینیٹ کی قائمہ کمیٹیوں سے بھی استعفے آنا شروع ہوگئے ہیں۔سینیٹر علی ظفر، سینیٹر اعظم سواتی، سینیٹر دوست محمد، سینیٹر ذیشان خانزادہ، سینیٹر مرزا محمد آفریدی، سینیٹر محسن عزیز نے اپنی اپنی قائمہ کمیٹیوں سے استعفیٰ دے دیا ہے۔سینیٹر علی ظفر نے اطلاعات و نشریات کمیٹی کی چیئرمین شپ سے استعفیٰ دے دیا۔سینیٹر اعظم سواتی نے پانچ قائمہ کمیٹیوں کے لیے اپنا استعفیٰ پارلیمانی لیڈر علی ظفر کو بھجوا دیا جو چیئرمین سینیٹ کو بھجوائیں گے۔انہوں نے کہا کہ پارٹی سربراہ کی ہدایت پر استعفیٰ دیا، موجودہ پارلیمانی نظام کے خلاف احتجاج کر رہے ہیں، قانون اور آئین کی حکمرانی کے لیے قائمہ کمیٹیاں بے کار ہو چکی ہیں۔سینیٹر ذیشان خانزادہ کی جانب سے چیئرمین سینیٹ کو بھجوائے گئے استعفے کے متن کے مطابق انہوں نے احتجاجاً 5 متعلقہ قائمہ کمیٹیوں کی رکنیت سے استعفیٰ دیا ہے، یہ استعفیٰ تحریک انصاف کے بانی کی ہدایت پر دیا گیا تھا۔سینیٹر ذیشان خانزادہ نے اوورسیز پاکستانیز کمیٹی کے چیئرمین، سینیٹ کی خارجہ امور، خزانہ اور محصولات، تجارت اور نجکاری کمیٹیوں کے رکن کے عہدے سے استعفیٰ دے دیا۔پی ٹی آئی کے سینیٹر دوست محمد نے حکومتی یقین دہانیوں، انسانی حقوق، فوڈ سیکیورٹی، غربت کے خاتمے اور ریلوے کی قائمہ کمیٹیوں سے بھی استعفیٰ دے دیا۔پی ٹی آئی کے حمایت یافتہ سینیٹر مرزا محمد آفریدی نے کامرس، انڈسٹریز اینڈ پروڈکشن، تعلیم، توانائی اور بین الصوبائی رابطہ کمیٹی سے استعفیٰ دے دیا۔سینیٹر مرزا آفریدی نے کہا کہ وہ تحریک انصاف کے بانی کی ہدایت پر قائمہ کمیٹیوں کی رکنیت سے مستعفی ہو رہے ہیں۔اس سے قبل سینیٹر محسن عزیز بھی تمام قائمہ کمیٹیوں سے مستعفی ہو چکے ہیں۔