نیپال: سوشل میڈیا پر پابندی کے خلاف پرتشدد مظاہرے، وزیراعظم اور وزیر داخلہ مستعفی

کھٹمنڈو: نیپال میں سوشل میڈیا پر پابندی کے خلاف پرتشدد مظاہروں کے بعد نیپال کے وزیراعظم اور وزیر داخلہ مستعفی ہوگئے۔نیپال کے دارالحکومت کھٹمنڈو کے مختلف علاقوں میں منگل کی صبح سے ہی مظاہرین احتجاج کر رہے ہیں۔ اس دوران ایک پرتشدد ہجوم نے وزیر اعظم کے پی شرما اولی اور صدر رام چندر پوڈیل کی ذاتی رہائش گاہوں کو آگ لگا دی۔ سوشل میڈیا پر سامنے آنے والی ویڈیوز میں لوگوں کو صدر کی رہائش گاہ میں توڑ پھوڑ کرتے دیکھا جا سکتا ہے۔مشتعل لوگوں نے سابق وزرائے اعظم پشپا کمل دہل (پرچنڈ) اور شیر بہادر دیوبا کے گھروں کے ساتھ ساتھ وزیر توانائی دیپک کھڑکا کی رہائش گاہ کو بھی نقصان پہنچایا اور پارلیمنٹ ہاؤس کو بھی آگ لگا دی۔حکومت کی جانب سے ملک گیر کرفیو کے نفاذ کے باوجود احتجاج جاری رہنے پر متعدد وزراء نے اپنے عہدوں سے استعفیٰ دے دیا۔عوامی دباؤ بڑھتے ہی وزیر اعظم کے پی شرما اولی نے تمام اپوزیشن جماعتوں کو طلب کیا اور کہا کہ پرتشدد احتجاج کسی کے مفاد میں نہیں ہے اور وہ بات چیت کے ذریعے مسائل کا حل تلاش کریں گے۔ تاہم احتجاج جاری رہنے پر وزیراعظم نے اپنے عہدے سے استعفیٰ دے دیا۔