علیمہ خان پر اڈیالہ جیل کے باہر 2 لڑکیوں نے انڈے پھینک دیئے

راولپنڈی: تحریک انصاف کے بانی عمران خان کی بہن علیمہ خان پر اڈیالہ جیل کے باہر 2 لڑکیوں نے انڈوں سے حملہ دیا۔ علیمہ خان کی میڈیا سے گفتگو کے دوران انڈے پھینکنے کا واقعہ پیش آیا، جس کے بعد پولیس نے 2 لڑکیوں کو حراست میں لے لیا، پولیس نے دونوں لڑکیوں کو اڈیالہ چوکی منتقل کردیا۔ عمران خان کی بہن علیمہ خان نے کہا کہ ہمیں اس بات کی فکر نہیں کہ کوئی ہم پر حملہ کرے، ہمیں معلوم ہے کہ ایسا ہو گا۔ اس کے بعد اڈیالہ جیل کے باہر موجود صحافیوں کے سوالوں کا جواب دینے کے بجائے بانی پی ٹی آئی کی بہن علیمہ خان گاڑی میں جا کر بیٹھ گئیں۔ اس وقت وہاں موجود پی ٹی آئی رہنماؤں اور کارکنوں کی صحافیوں سے تلخ کلامی بھی ہوئی اور علیمہ خان کی جانب سے سخت سوالات کیے جانے پر کارکن برہم ہوگئے۔ علیمہ خان نے اڈیالہ جیل کے باہر کہا تھا کہ ماحول بدل گیا ہے، عوام کا غصہ اور خوف دیکھ لیں، لوگ ناانصافی کو قبول نہیں کریں گے، پولیس بتا رہی ہے کہ ہمارے پاس بہت ہوگیا، 8 فروری کو لوگ کھڑے ہوئے، آج بھی کھڑے ہیں۔ انہوں نے کہا کہ پی ٹی آئی کے بانی عوام کی آواز ہیں، وہ جمہوریت اور قانون کی حکمرانی کی بات کرتے ہیں، یہ بانی پی ٹی آئی کی آواز کو خاموش کرنا چاہتے ہیں۔