حکومت نے 2 ماہ میں تنخواہ دار طبقے سے 85 ارب روپے ٹیکس وصول کیا

اسلام آباد: حکومت نے 2 ماہ میں تنخواہ دار طبقے سے 85 ارب روپے ٹیکس وصول کیا ہے۔فیڈرل بورڈ آف ریونیو (ایف بی آر) کے مطابق مالی سال 2025-26 کے پہلے 2 ماہ (جولائی اور اگست) کے دوران تنخواہ دار طبقے سے 85 ارب روپے انکم ٹیکس جمع کیا گیا جو کہ گزشتہ سال کی اسی مدت کے مقابلے میں 21 فیصد زیادہ ہے۔گزشتہ سال ان 2 ماہ میں 70 ارب روپے ٹیکس جمع کیا گیا تھا، اس طرح رواں مالی سال کے ابتدائی عرصے میں 15 ارب روپے کا اضافہ ریکارڈ کیا گیا۔اعدادوشمار کے مطابق نان کارپوریٹ ملازمین نے 41 ارب روپے ٹیکس جمع کیا، کارپوریٹ ملازمین نے 20 ارب روپے ٹیکس جمع کیا۔ صوبائی سرکاری ملازمین نے 10.5 ارب روپے جبکہ وفاقی ملازمین نے 7.6 ارب روپے انکم ٹیکس جمع کیا۔ سینئر پنشنرز پر لگائے گئے نئے ٹیکس سے 2 ماہ میں صرف 180 ملین روپے حاصل ہوئے۔رپورٹ میں مزید بتایا گیا کہ گزشتہ مالی سال میں ملازمت پیشہ افراد سے مجموعی طور پر 555 ارب روپے وصول کیے گئے جو کہ ایک سال میں 188 ارب روپے زیادہ ہیں۔پراپرٹی سیکٹر میں بھی نمایاں تبدیلی دیکھنے میں آئی، پلاٹوں کی فروخت پر ٹیکس وصولی 92 فیصد اضافے سے 28 ارب روپے جبکہ پراپرٹی کی خریداری پر ٹیکس کی وصولی 12 فیصد کم ہوکر 13 ارب روپے ہوگئی۔دوسری جانب ایف بی آر اگست میں 951 ارب روپے کے ہدف کے مقابلے میں صرف 901 ارب روپے اکٹھا کر سکا جس میں 50 ارب روپے کا شارٹ فال ریکارڈ کیا گیا۔ جولائی اور اگست میں مجموعی ہدف 1,698 ارب روپے تھا لیکن صرف 1,663 ارب روپے اکٹھے ہو سکے، اس طرح 35 ارب روپے کی کمی کا انکشاف ہوا۔ رواں مالی سال ٹیکس وصولی کا مجموعی ہدف 14131 ارب روپے ہے۔