طوفانی بارشوں نے پنجاب کے کئی شہروں میں ہولناک تباہی مچا دی

لاہور: راوی، ستلج اور چناب میں خطرناک سیلاب اور طوفانی بارشوں نے پنجاب کے کئی شہروں میں خوفناک تباہی مچا دی، سیکڑوں دیہات زیر آب آگئے، لاکھوں ایکڑ پر کھڑی فصلیں تباہ، گجرات میں طوفانی بارشوں سے شہری سیلاب نے نظام زندگی مفلوج کردیا۔راوی، چناب اور ستلج میں سیلاب سے پنجاب کے تقریباً 4 ہزار دیہات اور 38 لاکھ سے زائد افراد متاثر ہوئے ہیں جب کہ لاکھوں ایکڑ پر کھڑی فصلیں تباہ ہو گئی ہیں۔ بھارتی ہائی کمیشن نے انڈس واٹر کمیشن کو ایک اور خط ارسال کیا ہے جس کے مطابق دریائے ستلج کو ہریکے اور فیروز پور کے مقام پر اونچے درجے کے سیلاب کا سامنا ہے جس کے باعث پاکستان کی حدود میں پانی کے مزید ریلے آئیں گے۔فلڈ فورکاسٹنگ ڈویژن پنجاب کے مطابق پاکستان کے صوبہ پنجاب کے دریاؤں میں سیلابی صورتحال برقرار ہے، ہیڈ سودھنائی اور گنڈا سنگھ والا میں انتہائی اونچے درجے کا سیلاب ہے۔دریائے چناب میں ہیڈ خانکی، ہیڈ قادر آباد اور چنیوٹ پل پر بھی اونچے درجے کا سیلاب ہے۔ہیڈ مرالہ، راوی سائفن، شاہدرہ، بلوکی اور ہیڈ سلیمانکی میں اونچے درجے کا سیلاب ریکارڈ کیا گیا ہے جبکہ تریمو، جسر، اسلام اور میلسی سائفون میں درمیانے درجے کا سیلاب ریکارڈ کیا گیا ہے۔گڈو، سکھر، کوٹری اور پنجند میں نچلے درجے کا سیلاب ریکارڈ کیا گیا ہے۔ دریائے چناب سے ملحقہ نالہ ایک میں انتہائی اونچے درجے کا سیلاب اور نالہ پالکو میں اونچے درجے کا سیلاب۔دریائے راوی سے ملحقہ نالہ بسنتر اور نالہ نیان میں پانی کی سطح کم ہوگئی ہے۔