پنجاب میں سیلاب، سندھ میں سبزیوں کی قیمتیں آسمان کو چھونے لگیں

پنجاب میں سیلاب کی تباہ کاریوں کے اثرات سندھ تک پہنچ گئے، سیلاب سے امداد سندھ تک نہیں پہنچی بلکہ مہنگائی پہنچ گئی، سندھ میں قیمتیں آسمان کو چھونے لگی ہیں، پنجاب سے سبزیوں کی سپلائی متاثر ہوئی ہے۔سماء کے نمائندے امتیاز خاور کے مطابق پنجاب سے ٹماٹر کی سپلائی بند ہونے پر حیدرآباد میں 100 روپے کلو ملنے والے ٹماٹر 200 روپے کلو ہو گئے، اسی طرح 60 روپے کلو ملنے والے پیاز بھی 120 روپے فی کلو دستیاب ہونے لگے۔دکانداروں کا کہنا ہے کہ بارش کے باعث پنجاب سے آنے والی سبزیاں مہنگے داموں دستیاب ہو رہی ہیں۔سماء کے نمائندے جمیل مغل کے مطابق سکھر میں بھی سبزیوں کی قیمتیں آسمان کو چھونے لگی ہیں، 400 روپے کلو ملنے والے مٹر 600 روپے، آلو 120 روپے سے بڑھ کر 160 روپے اور پیاز 80 روپے سے بڑھ کر 180 روپے فی کلو ہو گئے۔رپورٹ کے مطابق پیاز جس کی قیمت 30 روپے فی کلو ہے وہ 70 روپے فی کلو، تور جس کی قیمت 100 روپے فی کلو ہے وہ 150 روپے اور بھنڈی جس کی قیمت 150 روپے فی کلو ہے وہ 200 روپے فی کلو فروخت ہو رہی ہے۔