سیلاب متاثرین کو خوراک فراہم کرنے سے کسی کو نہیں روکا، عظمیٰ بخاری

پنجاب کی وزیر اطلاعات عظمیٰ بخاری نے کہا ہے کہ پنجاب حکومت نے کسی نجی ادارے یا فرد کو سیلاب زدگان کو خوراک فراہم کرنے سے نہیں روکا۔انہوں نے اپنے بیان میں کہا کہ حکومت نے ضلعی انتظامیہ اور فوڈ اتھارٹی سے کہا کہ وہ کھانا تقسیم کرنے سے پہلے چیک کریں۔ بعض مقامات پر کچھ لوگوں نے ناقص خوراک کی تقسیم کی شکایت کی۔عظمیٰ بخاری کا کہنا ہے کہ یہ ہدایات سیلاب زدگان کی صحت کو مدنظر رکھتے ہوئے دی گئیں، متاثرہ علاقوں میں بیماریاں پھیلنے کا خدشہ ہے، یہ قدم عوام کی صحت کے تحفظ کے لیے اٹھایا گیا۔انہوں نے کہا کہ اس معاملے کو سیاسی پوائنٹ سکورنگ کے لیے استعمال نہ کیا جائے، کچھ لوگ کھانے کی تقسیم روکنے کے لیے جھوٹا پروپیگنڈا کر رہے ہیں۔وہ کہتی ہیں کہ مریم نواز خود ہر جگہ جا رہی ہیں تاکہ انتظامیہ کو پتہ چلے کہ کوئی دیکھ کر پوچھنے والا ہے۔ پنجاب کے عوام بھی جانتے ہیں کہ وقت کے حکمران ان کی بات سننے کے لیے ان کے پاس آئے تھے۔صوبائی وزیر اطلاعات نے یہ بھی کہا کہ عوام جانتے ہیں کہ ان کا وزیر اعلیٰ ہر حال اور ہر جگہ ان کے ساتھ کھڑا ہے۔