چینی صدر کا اقتصادی ترقی کے تمام شعبوں میں پاکستان کی حمایت جاری رکھنے کا اعلان

اسلام آباد: عوامی جمہوریہ چین کے صدر شی جن پنگ نے کہا ہے کہ چین اقتصادی ترقی کے تمام شعبوں میں پاکستان کی حمایت جاری رکھے گا، خاص طور پر جب سی پیک اپنے دوسرے مرحلے میں داخل ہو چکا ہے اور پاکستان کے اہم ترین اقتصادی شعبوں پر توجہ دے رہا ہے۔وزیراعظم شہباز شریف نے بیجنگ میں عوامی جمہوریہ چین کے صدر شی جن پنگ سے گریٹ ہال آف دی پیپلز میں ملاقات کی۔شہباز شریف ان دنوں چین کے سرکاری دورے پر ہیں۔ اپنی انتہائی خوشگوار ملاقات کے دوران، دونوں رہنماؤں نے پاکستان اور چین کے درمیان فولادی اور ہمہ موسمی تزویراتی تعاون پر مبنی شراکت داری کو مزید مضبوط بنانے کے لیے اپنے مشترکہ عزم کا اعادہ کیا۔وزیراعظم نے تیانجن میں شنگھائی تعاون تنظیم (SCO) سربراہان مملکت کے سربراہی اجلاس کے کامیاب انعقاد پر صدر شی جن پنگ کو مبارکباد دی اور عالمی فسطائیت مخالف جنگ کی 80ویں سالگرہ پر مبارکباد دی۔صدر شی جن پنگ کے وژن اور قیادت کی تعریف کرتے ہوئے، جس نے چین کو جدیدیت اور ترقی حاصل کرنے کے قابل بنایا، وزیراعظم نے کہا کہ پاکستان کو چین کی کامیابیوں پر بہت فخر ہے اور وہ اس عظیم سفر پر چین کے ساتھ کام کرنے کے لیے ہمیشہ تیار ہے۔وزیراعظم نے پاکستان کی علاقائی سالمیت، خودمختاری اور سماجی و اقتصادی ترقی کے لیے چین کی غیر متزلزل حمایت کو سراہا۔انہوں نے صدر شی کے بیلٹ اینڈ روڈ انیشیٹو (بی آر آئی) کے ایک اہم منصوبے کے طور پر چین پاکستان اقتصادی راہداری کی اہمیت کو سراہا اور سی پیک کے اپ گریڈ شدہ اگلے مرحلے کے کامیاب نفاذ کے لیے چین کے ساتھ کام جاری رکھنے کی اپنی خواہش کا اعادہ کیا، جس میں مزید پانچ راہداریوں کا اضافہ بھی شامل ہے۔ان اقدامات سے دونوں ممالک کو مشترکہ مستقبل کے ساتھ ایک مضبوط پاک چین کمیونٹی بنانے میں مدد ملے گی۔وزیراعظم نے کثیرالجہتی کو مضبوط بنانے کے لیے صدر شی جن پنگ کے پختہ عزم کو سراہتے ہوئے کہا کہ پاکستان اس سلسلے میں صدر شی جن پنگ کے تاریخی اقدامات کی مکمل حمایت کرتا ہے جن میں گلوبل گورننس انیشیٹو، گلوبل ڈویلپمنٹ انیشیٹو، گلوبل سیکیورٹی انیشیٹو اور گلوبل سولائزیشن انیشیٹو شامل ہیں۔وزیراعظم نے کہا کہ یہ اقدامات اجتماعی عالمی بھلائی کے لیے ضروری ہیں اور یہ علاقائی اور عالمی امن، استحکام اور ترقی میں معاون ثابت ہوں گے۔صدر شی نے کہا کہ چین اقتصادی ترقی کے تمام شعبوں میں پاکستان کی حمایت جاری رکھے گا، خاص طور پر جب سی پیک اپنے دوسرے مرحلے میں داخل ہو چکا ہے اور پاکستان کے اہم ترین اقتصادی شعبوں پر توجہ مرکوز کر رہا ہے۔دونوں رہنماؤں نے اس بات پر اتفاق کیا کہ ان کے ممالک کے درمیان تعلقات منفرد اور بے مثال ہیں اور اس کی عکاسی ان کے دوطرفہ تعاون کو مزید بڑھانے میں ہونی چاہیے۔دونوں رہنماؤں نے اہم علاقائی اور عالمی پیش رفت پر بھی تبادلہ خیال کیا اور اس سلسلے میں پاکستان اور چین کے درمیان قریبی تعاون جاری رکھنے پر اتفاق کیا۔وزیراعظم نے صدر شی جن پنگ کو پاک چین دوستی کی 75 ویں سالگرہ کے موقع پر اگلے سال پاکستان کا سرکاری دورہ کرنے کی اپنی مخلصانہ دعوت کی تجدید کی۔