بھارتی فوجی افسران اور افغان شہری پاکستان میں دہشت گردی میں ملوث ہیں، ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری نے واضح کیا ہے کہ ’’اس بات کے مصدقہ شواہد موجود ہیں کہ غیر قانونی افغان شہری دہشت گردی اور سنگین جرائم میں ملوث ہیں‘‘۔ڈی جی آئی ایس پی آر نے 5 ستمبر 2025 کو جرمن میگزین کے نمائندے سے اہم امور پر تفصیلی بات چیت کی۔جرمن میگزین کو دیئے گئے خصوصی انٹرویو میں ڈی جی آئی ایس پی آر کا کہنا تھا کہ پاکستان نے 40 سال تک لاکھوں افغان مہاجرین کی میزبانی کی، افغان مہاجرین کی باوقار واپسی کے لیے انتہائی منظم اقدامات کیے گئے ہیں اور پاکستان نے انسانی ہمدردی کی بنیاد پر افغان مہاجرین کے انخلا کی ڈیڈ لائن میں کئی بار توسیع کی ہے۔لیفٹیننٹ جنرل احمد شریف چوہدری نے کہا کہ افغان مہاجرین کو پناہ دینے کی بنیادی وجوہات غیر ملکی مداخلت اور خانہ جنگی تھیں لیکن وہ وجوہات اب موجود نہیں ہیں۔پڑوسی ملک سے متعلق ایک سوال پر ڈی جی آئی ایس پی آر نے کہا کہ بھارت میں پرتشدد واقعات بھارتی حکومت کی بڑھتی ہوئی انتہا پسندانہ پالیسیوں کا نتیجہ ہیں۔ بھارت اپنے اندرونی مسائل کو بیرونی جبکہ بیرونی مسائل کو اندرونی مسائل کے طور پر پیش کرتا ہے۔ بھارت ریاستی سرپرستی میں پاکستان میں دہشت گردی کی کارروائیوں میں ملوث ہے۔ڈی جی آئی ایس پی آر کا کہنا تھا کہ پاکستان میں دہشت گردی کی کارروائیوں میں بھارتی فوج کے حاضر سروس افسران کے ملوث ہونے کے مستند شواہد سامنے آچکے ہیں اور پاکستان متعدد بار اقوام متحدہ کے سامنے بھارتی دہشت گردی کے ثبوت پیش کر چکا ہے۔ انہوں نے کہا کہ عالمی برادری مسئلہ کشمیر کے حل کے لیے اپنا کردار ادا کرے۔لیفٹیننٹ جنرل احمد شریف چوہدری نے کہا کہ فوج سمیت بھارتی ریاستی ادارے انتہا پسند سیاسی نظریات کے زیر اثر ہیں۔ پاکستانی ریاست تمام غیر ریاستی عناصر کو بلا تفریق مسترد کرتی ہے۔ڈی جی آئی ایس پی آر نے واضح کیا کہ پاکستان میں کسی فوج یا مسلح گروپ کی کوئی جگہ نہیں، ریاست کے علاوہ کسی گروپ یا شخص کو جہاد کا اعلان کرنے کا اختیار نہیں۔لیفٹیننٹ جنرل احمد شریف چوہدری نے کہا کہ پاکستان نے دہشت گردی کے خلاف جنگ میں فرنٹ لائن سٹیٹ کا کردار ادا کیا اور دہشت گردی کے خلاف جنگ میں بے پناہ قربانیاں دیں۔ترجمان پاک فوج کا کہنا تھا کہ امریکی انخلاء کے بعد افغانستان میں بچا ہوا امریکی اسلحہ دہشت گردی میں استعمال ہورہا ہے اور امریکا نے بھی ان ہتھیاروں کے دہشت گردی کی کارروائیوں میں استعمال پر تشویش کا اظہار کیا ہے۔ڈی جی آئی ایس پی آر نے کہا کہ پاک بھارت کشیدگی اور انصاف کی جدوجہد کے دوران امریکی صدر ٹرمپ کا قائدانہ کردار ایک سٹریٹجک لیڈر کے طور پر سامنے آیا جب کہ پاکستان کے اپنے برادر ملک چین کے ساتھ بھی تعمیری اور تزویراتی تعلقات ہیں۔ڈی جی آئی ایس پی آر کا کہنا تھا کہ امریکا نے کالعدم مجید بریگیڈ کو عالمی دہشت گرد تنظیم قرار دے رکھا ہے، بلوچستان میں فتنہ الہند کے متعدد ہلاک دہشت گرد بھی نام نہاد لاپتہ افراد کی فہرست میں شامل ہیں۔