پاکستان نے قطر پر اسرائیلی حملے کی مذمت کرتے ہوئے اسے قطر کی خود مختاری اور علاقائی سالمیت کی کھلی خلاف ورزی قرار دیا ہے۔ وزیر اعظم شہباز شریف نے کہا ہے کہ اسرائیلی جارحیت کو فوری بند کیا جائے اور امت مسلمہ کو اس کے جواب میں اتحاد کا مظاہرہ کرنا ہو گا۔ڈان نیوز کے مطابق وزیراعظم محمد شہباز شریف نے قطر پر اسرائیلی حملے کے تناظر میں دوحہ کا ایک روزہ دورہ کیا، جہاں انہوں نے قطر کے امیر شیخ تمیم بن حمد الثانی سے ملاقات کی۔ وزیراعظم نے 9 ستمبر کو دوحہ پر اسرائیلی حملے کی شدید مذمت کرتے ہوئے اسے قطر کی خودمختاری اور علاقائی سالمیت کی کھلی خلاف ورزی قرار دیا۔انہوں نے کہا کہ پاکستان اس مشکل وقت میں قطر کے ساتھ کھڑا ہے اور دونوں ممالک کے درمیان تاریخی برادرانہ تعلقات ہمیشہ مضبوط رہیں گے۔ وزیراعظم نے اسرائیلی حملے میں قیمتی جانوں کے ضیاع پر گہرے دکھ کا اظہار کیا اور زخمیوں کی جلد صحت یابی کی دعا کی۔وزیراعظم نے اس بات پر زور دیا کہ اسرائیلی جارحیت کو فوری طور پر روکنا ہوگا اور امت مسلمہ کو اس کے مقابلے میں اتحاد کا مظاہرہ کرنا ہوگا۔ انہوں نے غزہ میں قیام امن کے لیے قطر کے تعمیری ثالثی کے کردار کو سراہتے ہوئے کہا کہ اسرائیل کے اشتعال انگیز اقدامات علاقائی استحکام اور سفارتی کوششوں کے لیے بڑا خطرہ ہیں۔وزیراعظم نے کہا کہ قطر کی درخواست پر پاکستان نے اقوام متحدہ کی سلامتی کونسل کا ہنگامی اجلاس بلانے کی تجویز دی جبکہ قطر کی جانب سے غیر معمولی عرب اسلامی سربراہی اجلاس کے انعقاد کے فیصلے کا خیر مقدم کیا جس میں پاکستان نے او آئی سی کی مشترکہ میزبانی پر رضامندی ظاہر کی ہے۔قطر کے امیر نے اظہار یکجہتی پر وزیراعظم کا شکریہ ادا کیا۔ دونوں رہنماؤں نے فلسطینی عوام کے جائز حقوق کی حمایت، علاقائی امن و استحکام کے فروغ اور بین الاقوامی قانون کی پاسداری کے عزم کا اعادہ کیا۔قبل ازیں وزیراعظم شہباز شریف ایک روزہ دورے پر قطر پہنچ گئے۔ قطر کے نائب وزیراعظم اور وزیر مملکت برائے دفاع شیخ سعود بن عبدالرحمن بن حسن الثانی نے دوحہ ایئرپورٹ پر وزیراعظم کا استقبال کیا۔ نائب وزیراعظم اور وزیر خارجہ محمد اسحاق ڈار، وزیر دفاع خواجہ محمد آصف، وزیر اطلاعات و نشریات عطاء اللہ تارڑ اور معاون خصوصی طارق فاطمی وزیراعظم کے ہمراہ پاکستانی وفد کا حصہ ہیں۔قطر اور پاکستان کے درمیان دیرینہ تاریخی برادرانہ تعلقات ہیں جو مشترکہ عقائد اور اقدار پر مبنی ہیں۔ پاکستان نے ہمیشہ ہر مشکل وقت میں قطر کا ساتھ دیا ہے اور کرتا رہے گا۔
0%
Leave a Comment