پنجاب: جلال پور پیروالا کو سیلاب نے گھیر لیا، لوگوں کا ہنگامی بنیادوں پر انخلا

لاہور، ملتان، بہاولپور: پنجاب میں سیلاب کی تباہ کاریاں جاری ہیں، ملتان کی تحصیل جلال پور پیر والا کو دریائے چناب میں اضافے کے باعث چاروں اطراف سے بڑے سیلاب نے گھیر لیا، لوگوں کو ہنگامی بنیادوں پر محفوظ مقامات پر منتقل کیا جا رہا ہے۔تازہ ترین واقعات میں سیلاب متاثرین کی کشتیاں الٹنے سے کم از کم 3 افراد جاں بحق اور 9 لاپتہ ہو گئے، ملتان سے ایک نوجوان کی لاش ملی ہے، 21 لاکھ ایکڑ سے زائد زرعی اراضی پر کھڑی فصلوں کو نقصان پہنچا ہے۔سی پی او ملتان صادق علی ڈوگر کا کہنا ہے کہ جلال پور پیر والا کو بچانے کے لیے بنائے گئے عارضی ڈیم پر پانی کا دباؤ بدستور بلند ہے، شہر سے آبادی کا تیزی سے انخلاء کیا جا رہا ہے۔صادق علی ڈوگر کا کہنا ہے کہ جلال پور پیر والا چاروں اطراف سے پانی میں گھرا ہوا ہے، تحصیل جلالپور کے نواحی علاقے زیر آب آچکے ہیں۔جلال پور پیر والا کے 138 دیہات زیر آب آگئے ہیں۔ادھر اوچ شریف کے علاقے بھکری کے قریب سیلابی پانی میں نجی کشتی الٹ گئی۔ کشتی میں سوار چار افراد سیلابی پانی میں ڈوب گئے جنہیں ریسکیو اہلکاروں نے بروقت بچالیا۔