نرگس فخری کی خفیہ شادی کی تصدیق

بالی ووڈ اداکارہ نرگس فخری خفیہ شادی کے بعد بالآخر اپنے شوہر ٹونی بیگ کے ساتھ پہلی بار منظر عام پر آگئیں۔ یہ جوڑا ممبئی میں ایک تقریب کے دوران ریڈ کارپٹ پر نظر آیا، جس کی ویڈیوز سوشل میڈیا پر تیزی سے وائرل ہوگئیں۔ویڈیوز میں نرگس اور ٹونی کو شادی کے بعد پہلی بار ایک ساتھ پوز دیتے ہوئے دیکھا گیا، ان کے ساتھ مشہور فلمساز فرح خان نے خوشگوار موڈ میں ٹونی کو مخاطب کرتے ہوئے کہا کہ ’اپنی بیوی کے ساتھ کھڑے رہو‘۔ یہ جملہ سن کر تقریب میں موجود لوگ مسکرا اٹھے۔رپورٹس کے مطابق نرگس فخری اور کشمیری نژاد بزنس مین ٹونی بیگ نے فروری 2025 میں لاس اینجلس کے فور سیزنز ہوٹل میں خفیہ شادی کی۔ تقریب انتہائی نجی تھی، جس میں صرف قریبی رشتہ داروں نے شرکت کی اور مہمانوں کو تصاویر یا ویڈیوز لینے کی اجازت نہیں تھی۔بعد ازاں کیک اور سجاوٹ کی کچھ تصاویر سوشل میڈیا پر وائرل ہوئیں جن پر ان دونوں کے نام این ایف اور ٹی بی کے ابتدائیہ تھے۔نرگس فخری کی شادی کی خبروں کے بعد اب پہلی بار فرح خان کے الفاظ اور جوڑے کی ریڈ کارپٹ پر موجودگی نے ان خبروں کی تصدیق کر دی ہے۔ شادی کے بعد نرگس نے سوئٹزرلینڈ سے اپنی تصاویر بھی شیئر کی تھیں جنہیں مداحوں نے ہنی مون کی جھلک قرار دیا۔