عافیہ صدیقی کیس: نیا بنچ بھی ٹوٹ گیا، جسٹس انعام امین کا کیس سننے سے انکار

اسلام آباد: امریکی جیل میں قید ڈاکٹر عافیہ صدیقی کی صحت اور وطن واپسی سے متعلق سماعت کے لیے بنایا گیا نیا بینچ بھی ٹوٹ گیا، جسٹس انعام امین منہاس نے کیس سننے سے انکار کردیا۔ اسلام آباد ہائی کورٹ کے جسٹس انعام امین منہاس نے لارجر بینچ کی تشکیل کے لیے فائل چیف جسٹس کو بھجوا دی۔ اسلام آباد ہائی کورٹ کے جسٹس انعام امین منہاس نے امریکی جیل میں قید ڈاکٹر عافیہ صدیقی کی صحت اور وطن واپسی کے لیے ان کی بہن ڈاکٹر فوزیہ صدیقی کی درخواست پر سماعت کی۔ درخواست گزار کے وکیل عمران شفیق ایڈووکیٹ عدالت میں پیش ہوئے اور کہا کہ لارڈ شپ، یہ معاملہ کافی پیچیدہ ہو گیا ہے، جس پر عدالت نے کہا کہ کوئی پیچیدگی نہیں ہوئی، چیف جسٹس کے ماسٹر آف روسٹر سے متعلق میرا فیصلہ موجود ہے۔ عمران شفیق ایڈووکیٹ نے کہا کہ میں نے یہ فیصلہ نہیں پڑھا۔ آپ نے کہا کہ چیف جسٹس ماسٹر آف روسٹر ہیں؟ جسٹس انعام امین منہاس نے کہا کہ منیب صاحب کی بھی یہی رائے ہے۔ میں نے بھی یہی فیصلہ دیا ہے، میرا فیصلہ ہے کہ ماسٹر آف روسٹر چیف جسٹس ہیں، دوسری رائے آئی کہ وہ نہیں، اب دو آراء کی وجہ سے یہ معاملہ لارجر بنچ کو بھیج رہا ہوں، ماسٹر آف روسٹر کون ہے، لارجر بنچ فیصلہ کرے گا۔ عدالت نے لارجر بنچ کی تشکیل کے لیے فائل چیف جسٹس کو بھجوا دی۔