فیلڈ مارشل کا قصور سیکٹر اور جلال پور پیر والا ملتان میں فلڈ ریلیف کیمپوں کا دورہ

فیلڈ مارشل سید عاصم منیر نے قصور سیکٹر اور جلال پور پیر والا ملتان میں فلڈ ریلیف کیمپوں کا دورہ کیا۔پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے قصور سیکٹر اور ملتان کے جلال پور پیر والا میں قائم فلڈ ریلیف کیمپوں کے دورے کے دوران سیلاب کی حالیہ صورتحال اور جاری امدادی سرگرمیوں کا جائزہ لیا۔دورے کا مقصد سول انتظامیہ اور فوج کے درمیان مربوط تعاون کو مزید بڑھانا تھا تاکہ متاثرہ آبادی کو بروقت اور موثر ریلیف فراہم کیا جا سکے۔ اس موقع پر چیف سیکرٹری پنجاب اور سول انتظامیہ کے دیگر اعلیٰ حکام بھی موجود تھے جب کہ آرمی چیف کو زمینی صورتحال اور جاری ریسکیو اور ریلیف آپریشنز پر تفصیلی بریفنگ بھی دی گئی۔پاک فوج کے ترجمان کے مطابق سول انتظامیہ سے گفتگو کرتے ہوئے فیلڈ مارشل سید عاصم منیر نے گڈ گورننس اور عوام دوست ترقی کی اہمیت پر زور دیا۔فیلڈ مارشل نے کہا کہ انفراسٹرکچر کی ترقی سمیت تمام اقدامات جو عوام کو بار بار آنے والے سیلاب سے ہونے والے نقصانات سے بچانے کے لیے ضروری ہیں، ترجیحی بنیادوں پر مکمل کیے جائیں۔ ریاست ہر سال قیمتی جانوں اور املاک کے ضیاع کی متحمل نہیں ہو سکتی۔آرمی چیف نے سیلاب سے متاثرہ افراد سے بھی ملاقات کی، جنہیں پاک فوج اور سول انتظامیہ نے کامیابی سے محفوظ مقامات پر منتقل کیا۔ اس موقع پر متاثرین نے مشکل وقت میں بروقت مدد فراہم کرنے پر پاک فوج کا تہہ دل سے شکریہ ادا کیا۔فیلڈ مارشل عاصم منیر نے ریلیف آپریشن میں مصروف جوانوں، ریسکیو 1122 کے اہلکاروں اور پولیس سے بھی ملاقات کی اور ان کے بلند حوصلے، آپریشنل تیاری اور انتھک عزم کو سراہا۔ فیلڈ مارشل نے کہا کہ مشکل حالات میں سول انتظامیہ کے ساتھ قریبی رابطے میں رہتے ہوئے قوم کی خدمت کے لیے ان کی دن رات کاوشیں قابل ستائش ہیں۔آرمی چیف نے سیلاب سے متاثرہ علاقوں کا لاہور قصور اور ملتان جلال پور پیر والا کلہاڑیوں کا فضائی سروے بھی کیا تاکہ نقصان کی حد اور جاری امدادی سرگرمیوں کا براہ راست اندازہ لگایا جا سکے۔قبل ازیں لاہور اور ملتان کے کور کمانڈرز نے فیلڈ مارشل سید عاصم منیر کا قصور اور ملتان پہنچنے پر استقبال کیا۔