شوال کا چاند نظر آنے کے باقاعدہ اعلان کے بعد ملک بھر کے بازاروں میں رش بڑھ گیا اور خریداری عروج پر پہنچ گئی۔
رویت ہلال کمیٹی کا اجلاس وزارت مذہبی امور کے مرکزی دفتر کوہسار بلاک میں ہوا جس کی صدارت چیئرمین کمیٹی مولانا عبدالخبیر آزاد نے کی۔
اجلاس کے بعد پریس کانفرنس کرتے ہوئے مولانا عبدالخبیر آزاد کا کہنا تھاکہ کراچی، دیر، فیصل آباد، اسکردو اور ملک کے مختلف علاقوں سے چاند نظر آنے کی شہادتیں موصول ہوئیں۔
انہوں نے اعلان کیا کہ اتفاق رائے سے فیصلہ کیا گیا یکم شوال المکرم 1445 ہجری 10 اپریل بروز بدھ کو ہوگی۔
رویت ہلال کمیٹی کی جانب سے چاند نظر آنے کے باقاعدہ اعلان کے بعد ملک بھر کے بازاروں میں رش بڑھ گیا، خواتین کے ساتھ بچے اور مرد حضرات بھی تیاریوں کو فائنل ٹچ دینے میں لگ گئے۔
کہیں میچنگ کی جوتی رہ گئی تو کہیں چوڑیاں رہ گئيں ،کسی کا سوٹ درزی کے پاس رہ گیا تو کسی نے پارلر جانا ہے ، بچہ پارٹی بھی کہیں چشمے،کہیں گھڑیوں کے اسٹالز پر لٹک گئے۔
عید ی کے لیے لفافے بھی چیک لسٹ میں سرفہرست ہیں جبکہ مرد حضرات نے بھی سیلون پر ایسا رش لگایا کہ نائیوں نے بھی ہاؤس فل کا بورڈ لگادیا۔
Leave a Comment