عام آدمی مہنگائی کے ہاتھوں پس گیا، اشرافیہ کو سبسڈی دینے کا کوئی جواز نہیں: وزیراعظم

وزیر اعظم شہباز شریف نے پہلے کابینہ اجلاس سے خطاب میں کہا ہے کہ عام آدمی مہنگائی کے ہاتھوں پس گیا، اشرافیہ کو سبسڈی دینے کا کوئی جواز نہیں، حالات درست کرنے کیلئے اب یا کبھی نہیں کا مرحلہ آگیا۔

وفاقی کابینہ کے تعارفی اجلاس سے خطاب میں شہباز شریف کا کہناتھاکہ ہم سب کیلئے  یہ عزت اوراعزاز کا لمحہ ہے، اپنی اور پارٹی قائد نواز شریف کی طرف سے کابینہ کو مبارکباد دیتا ہوں، ہم اس قوم کی خدمت کےلیے منتخب ہوئے ہیں، الیکشن میں قوم نے مختلف سیاسی جماعتوں کو مینڈیٹ دیا۔

انہوں نے کہا کہ پچھلی اتحادی حکومت نے ملک کو دیوالیہ ہونے سے بچایا، پاکستان کو معاشی چیلنجز کا سامنا ہے، حالات کچھ بھی ہوں ہم اس ملک کی ذمہ داری سنبھالیں گے، وفاقی حکومت نے رمضان میں 12ارب روپے کا پیکج دیا ہے، یوٹیلٹی اسٹورز پر اشیائےخوردونوش مناسب قیمتوں پر فراہم کی جائیں گی، بینظیر انکم سپورٹ پروگرام کے تحت بھی اربوں روپے مستحقین کو دیے جارہے ہیں۔

ان کا کہنا تھاکہ ہم سب کی ذمہ داری ہے یوٹیلٹی اسٹورز کی مکمل نگرانی کی جائے، وفاق صوبوں سے مل کر اشیا کی قیمتیں کنٹرول کرنے کیلئےکوششیں کرے گا، اشیا کی مناسب قیمتوں پر دستیابی یقینی بنانے کیلئے ہر ممکن اقدامات کریں گے اور غریب آدمی کو ریلیف فراہمی کیلئے بھرپورکوششیں کریں گے۔

وزیراعظم کا کہنا تھاکہ بجلی چوری کی مد میں سالانہ اربوں روپے کے نقصان سے غریب آدمی متاثرہورہاہے، مہنگائی پرجتنی جلدی قابوپالیں گے اتنا ہی قوم کیلئے فائدہ مندرہے گا، گیس اور بجلی کے گردشی قرضے 5 ہزار ارب سے بڑھ گئے ہیں، مٹھی بھر اشرافیہ 90فیصد وسائل پر قابض ہے، اشرافیہ کو دی جانے والی سبسڈیز کا کیا جواز ہے ؟ اشرافیہ کو سبسڈی جتنی جلد ختم کریں گے قوم کا بھلاہوگا۔

انہوں نے مزید کہا کہ بجلی کی مد میں سالانہ 5 سو ارب روپے چوری ہوتی ہے اس میں غریب آدمی کا کیا قصور ہے، گیس بجلی کا گردشی قرض پانچ ہزار ارب روپے ہے، بجلی سرپلس ہے سوچا ہی نہیں گیا کہ اس کو منافع بخش کیسے بنایا جائے، تنخواہیں بھی ادھارلے کر دےرہےہیں، ہول سیلر غائب اور چھوٹے دکاندار کو پکڑ رہے ہیں۔

ان کا کہنا ہے کہ مہنگائی اور کرپشن کے خلاف مل کر جنگ لڑنی ہے، ایف بی آر کے ریونیو اور دیگر معاملات پرمیٹنگز لی ہیں، ٹیکس سلیب کم کرنے کاحامی ہوں، کل بات ہورہی تھی کہ ریٹیلرز پر ٹیکس لگانا چاہیے، عالمی ادارے ریٹیلرز پر ٹیکس لگانے کا تقاضا کررہے ہیں، ریٹیلرز کی بات تو بعد میں آتی ہے ہول سیلر کہاں گیا؟ دکاندار جو مشکل سے روزی کمارہا ہے اس کو پکڑ رہے ہیں۔

شہباز شریف کا کہنا تھاکہ عوام نے ہمیں ووٹ دیاہے توجواب دہ ہم ہیں، ایک سیکنڈ وقت کا ضیاع قبول نہیں کروں گا، تجربہ اورجوان خون انجن بنتاہے قوم کو آگے لے کر جاتاہے، قربانی،ایثار کاجذبہ ہوگا تو ہماری کشتی ضرور کنارےپرلگےگی، محصولات کا زیادہ حصہ جیبوں میں چلاجاتاہے، ان شاءاللہ آئی ایم ایف سےجان چھوٹے گی.

انہوں نے کہا کہ برادرملک کےسفیرسےکہا ہے آپ سے اب قرض کی نہیں سرمایہ کاری کی بات کروں گا، ہمیں آپس میں نہیں غربت کےخلاف جنگ لڑنی ہے، سرجیکل آپریشن کرناہوگا اینٹی بائیوٹک سےکام نہیں چلے گا۔