حکومت کی معاونت سے خواتین کو وظائف دینے کی تجویز زیر غور ہے ‘ وائس چیئرمین پنجاب بار کونسل
لاہور( رپو رٹر)پنجاب بار کونسل کے وائس چیئر مین کامران بشیر مغل نے کہا ہے کہ وزیراعلیٰ مریم نواز شریف کو جلد پنجاب بار کونسل کے دورے کی دعوت دی جائے گی ، پنجاب حکومت کی معاونت سے خواتین کو وظائف دینے کی تجویز زیر غور ہے جس پر موثر پیشرفت کی جائے گی ، وزیر اعلیٰ پنجاب خود بھی ایک خاتون ہیں اس لئے ہم امید رکھتے ہیں کہ وہ خواتین وکلاء کی فلاح و بہبود کیلئے بھرپور تعاون فراہم کریں گی ۔
اپنے بیان میں وائس چیئرمین کامران بشیر مغل نے کہا کہ پاکستان میں خواتین کی تعداد ہماری آبادی کا نصف سے بھی زائد ہے ، اگر حکومت بھرپور توجہ مرکوز کرے تو خواتین کو قومی دھارے میں شامل کر کے ملک کی تقدیر بدلی جا سکتی ہے ۔ انہوں نے مزید کہا کہ خواتین کامعاشرے میں انتہائی اہم کردار ہے ، مختلف شعبوں میں کام کرنے والی خواتین نے اپنی صلاحیتوں کا لوہا منوایا ہے جو قابل فخر بات ہے ۔
انہوں نے کہا کہ خواتین وکلاء کی فلاح و بہبود کے لئے کئی منصوبے زیر غور ہیں اور اس حوالے سے پنجاب حکومت سے معاونت حاصل کی جائے گی اور اسی تناظر میں وزیر اعلیٰ پنجاب مریم نواز شریف کو جلد پنجاب بار کے دورے کی دعوت دیں گے۔
Leave a Comment