اداکار سے کسی صورت شادی نہیں کروں گی، سونیا حسین

کراچی (شو بز رپو رٹر) معروف اداکارہ سونیا حسین نے کہا ہے کہ وہ کسی صورت بھی اداکار سے شادی نہیں کریں گی، کیوں کہ وہ نرگسیت کا شکار ہوتے ہیں اور ہر وقت خود کو ہی سنوارتے رہتے ہیں۔ ایک ٹی وی شو میں گفتگو کرتے ہوئے اداکارہ نے بتایا کہ جس نسل سے وہ تعلق رکھتی ہیں، وہ مختلف ہے اور انہیں ایسا لگتا ہے کہ نئی نسل کے لوگوں میں اخلاقیات کی کمی ہے، انہیں اس بات کا علم تک نہیں کہ خواتین سے کس طرح پیش آنا چاہئیے اور بڑوں کی عزت کیسے کی جائے۔

سونیا حسین کا یہ بھی کہنا تھا کہ بہت سارے لوگ ان سے شادی سے متعلق پوچھتے رہتے ہیں تاہم اس وقت ان کا شادی کا کوئی ارادہ نہیں۔ انہوں نے کہا وہ ایسے شخص کے ساتھ شادی نہیں کرسکتیں جو انہیں پسند ہی نہ ہو، اس لیے وہ ارینج میرج بھی پسند کے شخص سے کریں گی۔ایک اور سوال کے جواب میں سونیا حسین نے واضح کیا کہ وہ کسی صورت میں اداکار سے شادی نہیں کریں گی، کیوں کہ ان کے خیال میں اداکار نرگسیت کا شکار ہوتے ہیں، وہ ہر وقت خود پسندی میں مبتلا ہوتے ہیں۔