وعدوں سے تکمیل تک کا سفر پھر شروع ہونے جا رہا ہے:ملک افضل کھوکھر

مریم نواز بہترین وزیراعلی پنجاب ثابت ہوں گی ،انشااللہ پنجاب ترقی کے راستے گامزن ہوگا

لاہور (رپو رٹڑ) مسلم لیگ (ن) کے مرکزی رہنما و نومنتخب رکن قومی اسمبلی ملک افضل کھوکھر نے کہا ہے کہ وعدوں سے تکمیل تک کا سفر پھر شروع ہونے جا رہا ہے ، مریم نواز بہترین وزیراعلی پنجاب ثابت ہوں گی ،انشااللہ پنجاب ترقی کے راستے گامزن ہوگا۔

انہوںنے الیکشن میں کامیابی پر حلقے کے عوام کا شکریہ ادا کرتے ہوئے کہا کہ عوام نے مجھے کامیاب کروا کے اپنا حق ادا کر دیا اب ہم علاقے میں ترقی کی راہیں کھولیں گے ، اب پھر سے وعدوں کی تکمیل ہوگی اور خوابوں کو تعبیر ملے گی ،قائد نوازشریف کی رہنمائی میں ترقی و خوشحالی کا سفر وہیں سے ہوگا شروع جہاں رکا تھا ۔

ملک افضل کھوکھر نے کہا کہ الحمدللہ اس حقیقت سے مسلم لیگ (ن) کے مخالفین کو بھی انکار نہیں کہ میاں نوازشریف کے ادوار ہی اس ملک میں ترقی و خوشحالی کا عملی نمونہ پیش کرتے ہیں عوام نے تین مرتبہ انہیں وزیراعظم منتخب کیا اور انہوں نے حقیقی معنوں میں عوام کی خدمت کا حق ادا کیا۔

انہوں نے کہا کہ پاکستان کی پہلی خاتون وزیراعلی پنجاب کا اعزاز قوم کی آواز مریم نواز شریف کو حاصل ہونے جارہا ہے، مریم نوازشریف کی مسلم لیگ (ن) کے لیے خدمات بے مثال ہیں انتہائی برے وقت میں جب پوری پارٹی پابند سلاسل تھی بدترین ظلم ڈھایا جارہا تھا تاریک گھڑیوں میں بیٹی نے پارٹی کی لازوال خدمت کی ہے، انشااللہ پنجاب پھر سے ترقی کے راستے گامزن ہوگا۔