پیپلزپارٹی کے چیئرمین بلاول بھٹو نے شیر کے شکار کے لیے ن لیگی کارکنوں کا ہی ساتھ مانگ لیا۔
گجرات میں جلسے سے خطاب کرتے ہوئے چیئرمین بلاول بھٹو نے مسلم لیگ ن کے کارکنوں کو پی پی کو ووٹ ڈالنے کا مشورہ دیتے ہوئے کہا کہ اصل جمہوریت چاہیے تو تیر پر مہر لگانی ہوگی۔بلاول نے نواز شریف پر تنقید کرتے ہوئےکہا کہ کوئی تو وجہ ہے کہ شیر شکار کے لیے نہیں نکل رہا،شیر تو کہہ رہا ہے کہ کوئی اور اُن کے لیے شکار کرے تو بادشاہ سلامت بن کر وہ باہر آجائیں گے۔
بلاول بھٹو کا کہنا تھا کہ پیپلزپارٹی پنجاب کے جیالوں نے اس الیکشن میں کمال کر دیا ہے، جو کہتے تھے پیپلزپارٹی پنجاب میں موجود نہیں، آج کل وہ دن رات پیپلزپارٹی کہہ رہے ہیں، اگر کوئی جماعت الیکشن مہم چلا رہی ہے تو وہ پی پی ہے۔
انہوں نے کہا کہ ہم نے خیبرپختونخوا، بلوچستان اور سندھ کے دورے کیے، ہمارے مخالف تو گھروں سے باہر ہی نہیں نکل رہے، یہ کیسی جماعت ہے جس کا لیڈرچوتھی بار وزیراعظم بننے کو تیار ہے لیکن منشور تیار نہیں، ہمارے منشور کے دس نکات پر عمل ہوا تو ملک کے تمام مسائل حل ہوجائیں گے۔بلاول بھٹو نے جلسے سے خطاب میں کہا کہ آپ سے وعدہ ہے کہ پاکستان کے عوام کی آمدنی کو دگنا کریں گے، دوسرا وعدہ آپ کو 300 یونٹ تک سولر بجلی مفت دیں گے، آپ سے تیسرا وعدہ ہے کہ ہم غریبوں کو 30 لاکھ گھر بنا کر دیں گے۔
انہوں نے کہا کہ پنجاب سمیت ملک بھر کی خواتین کی خدمت کرنا چاہتا ہوں، پہلے ہم نے خواتین کیلئے بے نظیر کارڈ دیا،اب کسانوں کو کسان کارڈ دیں گے،مزدوروں کے لیے ہم بے نظیر مزدور کارڈ لے کر آئیں گے، مزدوروں کو صرف اپنی مزدوری کی فکر کرنا ہوگی باقی مسائل ہم حل کریں گے۔
بلاول کا کہنا تھا کہ صحت کے شعبے میں سندھ میں وہ کام کیا جو یہ تین بار وزیراعظم بن کر نہیں کرسکے، گردوں اور جگر کے علاج کیلئے پہلے بھارت جانا پڑتا تھا اب سندھ میں علاج ہو رہا ہے،جن کارکنوں نے ووٹ کو عزت دو کا نعرہ لگا کر ظلم برداشت کیا ان کی جماعت نے اپنا نظریہ چھوڑ دیا۔
انہوں نے پی ٹی آئی کارکنان سے مخاطب ہوکر کہا کہ اگر میاں صاحب کو وزیراعظم بننے سے روکنا ہے تو انہیں تیر پر ٹھپا لگانا ہوگا، 8 فروری کو ان کا بندوبست کر کے ایون فیلڈ اپارٹمنٹس واپس بھجوائیں گے۔
اس کے علاوہ بلاول نے الیکشن میں کامیابی کی صورت میں اپنا پہلا حکم بھی بتادیا، انہوں نے تمام سیاسی کارکنوں کو رہا کرنے اور دہشت گردی کا مقابلہ کرنے کا اعلان کر دیا۔
بلاول نے کہا کہ میرے لیے یہ حرام ہوگا کہ اپنے مخالف کی بیٹیوں اور اہل خانہ کو جیل میں ڈالوں،میں دہشت گردی کا مقابلہ، خارجہ سطح پر پاکستان کی عزت بحال کروں گا، میں وزیراعظم بنا تو پاکستان کے نوجوان جاپان سے امریکا تک نوکریاں کریں گے، 16 ماہ میں بحیثیت وزیرخارجہ میں نے دنیا دیکھی کہ کام کیسے کیا جاتا ہے۔
Leave a Comment