پاکستان میں کاروبار کا فروغ ، ایل او سی اے اور پی ایچ کے ٹی آئی ایف کے درمیان معاہدے پر دستخط

دونوں ادارے پاکستان اور ہانگ کانگ کے درمیان تجارت اور سرمایہ کاری کے مواقع کو فروغ دینے پر توجہ مرکوز کریں گے
لاہور (رپو رٹر ) لاہور اوورسیز چائنیز ایسوسی ایشن (ایل او سی اے ) اور پاکستان ہانگ کانگ ٹریڈ اینڈ انوسٹمنٹ فورم (پی ایچ کے ٹی آئی ایف )کے درمیان مفاہمت کی یادداشت پر دستخط ہو گئے ۔ ایم او یو کی شرائط کے تحت دونوں ادارے پاکستان اور ہانگ کانگ کے درمیان تجارت اور سرمایہ کاری کے مواقع کو فروغ دینے، بزنس ٹو بزنس(بی ٹو بی ) تعلقات کو بڑھانے اور ہانگ کانگ میں پاکستانی مصنوعات کے لیے مارکیٹ تک رسائی کو آسان بنانے پر توجہ مرکوز کریں گے۔ گوادر پرو کے مطابق ایل او سی اے اور پی ایچ کے ٹی آئی ایف نے پاکستان، ہانگ کانگ ایس اے آر اور مکا ایس اے آر میں مقامی مارکیٹوں کی تلاش اور پاکستان میں کاروبار کی ترقی اور سرمایہ کاری بڑھانے میں مدد فراہم کرنے پر اتفاق کیا ہے۔

ایم او یو پر دستخط سے مشترکہ اقدامات کے سلسلے کی راہ ہموار ہونے کی توقع ہے جن میں بزنس میچ میکنگ ایونٹس، ٹریڈ مشنز اور ورکشاپس شامل ہیں جن کا مقصد پاکستانی کاروباری اداروں کی بین الاقوامی تجارت میں مشغول ہونے کی صلاحیت میں اضافہ کرنا ہے۔ گوادر پرو کے مطابق پاکستان میں چینی کمیونٹی نے معاشی ترقی اور ثقافتی تبادلوں کو فروغ دینے میں اہم کردار ادا کیا ہے۔ پی ایچ کے ٹی آئی ایف کے ساتھ شراکت داری ان تعلقات کو مزید مستحکم کرے گی اور کاروباری ترقی کی نئی راہیں کھولے گی۔ اس تعاون کے ذریعے دونوں فریقین اپنے ممبران کے لئے زیادہ سے زیادہ کاروباری مواقع پیدا کرنا چاہتے ہیں اور پاکستان کی اقتصادی خوشحالی میں اپنا کردار ادا کرنا چاہتے ہیں۔

گوادر پرو کے مطابق مفاہمتی یادداشت پر پی ایچ کے ٹی آئی ایف کی جانب سے ایل او سی اے کی نائب صدر ہی یوبنگ اور ہانگ کانگ میں پاکستان کے قونصل جنرل کے ٹریڈ ڈیولپمنٹ آفیسر علی اعوان نے ہانگ کانگ ایس اے آر میں پاکستان کے قونصل جنرل شہزاد احمد خان راجپوت کی موجودگی میں دستخط کیے۔ صنعت کے ماہرین نے اس شراکت داری کو پاکستان اور ہانگ کانگ دونوں کے لئے فائدہ مند صورتحال قرار دیا ہے ، جس میں دوطرفہ تجارت اور سرمایہ کاری کو فروغ دینے ، ملازمتوں کے مواقع پیدا کرنے اور دونوں خطوں میں معاشی ترقی کو آگے بڑھانے کی صلاحیت ہے۔