ہم نے 8 فروری کا الیکشن پوری قوت سے لڑنا ہے حنیف عباسی

ن لیگ کی قیادت نے راولپنڈی کو میگا پراجیکٹس دیئے اب وقت آ گیا ہے کہ ہم اپنی قیادت کا قرض چکائیں گے

راولپنڈی ( رپو ر ٹر ) سابق وفاقی وزیر و قومی اسمبلی کے حلقہ این اے 56 سے مسلم لیگ ن کے امیدوار محمد حنیف عباسی نے کہا ہے کہ ہم نے 8 فروری کا الیکشن پوری قوت سے لڑنا ہے ۔ اس حلقہ سے سابق ممبران اسمبلی نے صرف عوام کو بے وقوف بنایا ۔ ن لیگ کی قیادت نے راولپنڈی کو میگا پراجیکٹس دیئے اب وقت آ گیا ہے کہ ہم اپنی قیادت کا قرض چکائیں گے ۔ میرے ساتھ دونوں ایم پی اے کے امیدوار علاقے کی خدمت کرینگے ۔ راولپنڈی کی عوام نے ہمیشہ ہمارے ترقیاتی کاموں پر ہمیں ووٹ دیئے ہیں اور 8 فروری کو ایک مرتبہ پھر پورے راولپنڈی سے مسلم لیگ ن کے امیدوار کامیاب ہونگے ۔

ا ن خیالات کا اظہار انہوں نے گزشتہ روز مسلم لیگ ن کے رہنما و سابق ممبرٹیکنوکریٹ جاوید انور مغل کی جانب سے اپنی رہائش گاہ مغل ہائوس میں مسلم لیگ ن کے امیدواروں کے اعزاز میں دیئے گئے استقبالیہ سے خطاب کرتے ہوئے کیا۔ استقبالیہ کی تقریب جلسہ کی صورت اختیار کر گئی ۔ استقبالیہ کی تقر یب سے پی پی 17کے امیدوار راجہ حنیف ایڈووکیٹ، پی پی 16 کے امیدوار ضیا اللہ شاہ، سردار نسیم خان ، طاہرہ اورنگزیب،جاوید انور مغل، پیرزادہ راحت قدوسی، طفیل سبزواری، حسیب شاہ،راجہ مشتاق ، غیور بٹ،انچارج مرکزی الیکشن آفس حامد عباسی نے بھی خطاب کیا۔ تقریب میں پاکستان پیپلز پارٹی کے مرکزی رہنما طفیل سبزواری نے حلقہ این اے 56 سے حنیف عباسی کی مکمل حمایت کا اعلان بھی کیا۔ تقریب سے خطاب کرتے ہوئے این اے 56 کے امیدوار حنیف عباسی کا کہنا تھا کہ ۔میاں نواز شریف اور میاں شہباز شریف نے ہمیشہ راولپنڈی کی تعمیر و ترقی میں دلچسپی لی ہے اور ہمارے لیے بڑے بڑے پراجیکٹ بھی دیئے ہیں ۔

راولپنڈی کے تمام رہنمائوں الیکشن کو الیکشن سمجھ کر لڑنا ہے کسی نے بھی اس الیکشن کو کمزور نہیں لینا ہم اپنی کارکردگی عوام کے سامنے لے کر جا رہے ہیں ۔ پورے ملک سے ن لیگ کامیاب ہو گی تو مسائل کا حل نکالیں گے ۔ تقریب سے خطاب کرتے ہوئے حلقہ پی پی 17 کے امیدوار راجہ حنیف ایڈووکیٹ نے کہا کہ یہ الیکشن پاکستان کی بقا کا الیکشن ہے اور ن لیگ یہ الیکشن جیت کر ملک کو ایک مرتبہ پھر سے ترقی کی راہ پر گامزن کرے گی ۔ پی پی16 سے ایم پی اے کے امیدوار ضیا اللہ شاہ کا کہنا تھا کہ جس طرح حنیف عباسی نے راولپنڈی کے عوام کی خدمت کی ہے آئندہ بھی یہ خدمت جاری رکھیں گے ۔

ہمارے دروازے عوام کے لیے کھلے ہیں ۔ ہم صرف خدمت کی سیاست پر یقین رکھتے ہیں ۔ ن لیگ شعبہ خواتین کی صدر طاہرہ اورنگزیب کا کہنا تھا کہ نواز شریف اس ملک کی ترقی ، خوشحالی ، دہشگردی سے نجات،اور امن کا نا م ہے 8 فروری کو ن لیگ کامیاب ہو گی اور نواز شریف اس ملک کے چوتھی مرتبہ وزیر اعظم بنیں گے ۔ مسلم لیگ ن راولپنڈی کے صدر سردار نسیم خان نے تمام کارکنان اور رہنمائوں سے اپیل کرتے ہوئے کہا کہ یہ الیکشن ہم سب کا الیکشن ہے اور ن لیگ ایک مرتبہ پھر راولپنڈی سے اپنی سیٹ واپس لے گی اور جو ڈاکہ عوام کے ووٹوں پر مارا گیا اس کا بدلہ لیں گے۔