پیپلز پارٹی کے سینیٹر بہرہ مند تنگی نے الیکشن ملتوی کرنے کی سینیٹ میں منظور ہونے والی قرارداد پر خاموشی کی تردید کر دی۔
پیپلز پارٹی کے سینیٹر بہرہ مند تنگی نے دعویٰ کیا کہ انہوں نے اور پی ٹی آئی کے سینیٹر گردیپ سنگھ نے الیکشن ملتوی کرنے کی قرارداد کی مخالفت کی تھی۔ البتہ بہرہ مند تنگی نے سینیٹ اجلاس میں کورم کی نشاندہی نہ کرنے کی غلطی تسلیم کرتے ہوئے کہا کہ وہ غلطی مانتے ہیں کہ کورم کی نشاندہی نہیں کر سکے ، اگر کورم کی نشاندہی کرتے تو یہ نوبت ہی نہ آتی۔
خیال رہے کہ ایوان بالا (سینیٹ) نے ملک میں 8 فروری کو ہونے والے عام انتخابات ملتوی کرانے کی قرارداد کثرت رائے سے منظور کرلی۔
چیئرمین سینیٹ صادق سنجرانی کی سربراہی میں ہونے والے سینیٹ اجلاس میں قرارداد کی منظوری کے وقت ایوان میں 14 ارکان موجود تھے، خیبرپختونخوا سے آزاد سینیٹر دلاور خان نے الیکشن التوا کی قرارداد پیش کی، قرارداد کی بی اے پی ارکان اور فاٹا سے رکن ہدایت اللہ نے حمایت کی۔
پی ٹی آئی کے سینیٹرگردیپ سنگھ اور پیپلزپارٹی کے رکن بہرہ مند تنگی نے خاموشی اختیار کی، ایوان میں موجود مسلم لیگ ن کے رکن افنان اللہ نے قرارداد کی مخالفت کی۔بعد ازاں پیپلزپارٹی نے سینیٹ میں الیکشن ملتوی ہونے کی قرارداد سے متعلق سینیٹر بہرہ مند تنگی کو شوکاز جاری کردیا۔
شوکاز میں کہا گیا ہے کہ آپ نے پارٹی لیڈرشپ کی ہدایات اور پارٹی پالیسی کی خلاف ورزی کی، واضح کریں کیوں آپ نے قرارداد کی حمایت کی اور حمایت میں تقریر بھی کی؟نوٹس کے متن کے مطابق آپ کو معلوم ہے 8 فروری کے انتخابات کیلئے پارٹی پرعزم ہے، اس کے باوجود آپ نے قرارداد کی حمایت کیوں کی؟ لہٰذا ایک ہفتے میں جواب دیں۔
Leave a Comment