امید ہے وزیر اعظم معیشت میں حصہ ڈالنے والے اسٹیک ہولڈرز سے مشاورت کی روایت ڈالیںگے ‘ کارپٹ ایسوسی ایشن

بجٹ تجاویز تیار کر رہے ہیں،ڈرافٹ وزیرا عظم ،وزارتوں ،ایف بی آر کو ارسال کیا جائے گا ، وزیر اعظم شہباز شریف کو مبارکباد

لاہور( رپو رٹر)پاکستان کارپٹ مینو فیکچررز اینڈ ایکسپورٹرز ایسوسی ایشن نے شہباز شریف کو وزیر اعظم منتخب ہونے پر مبارکباد دیتے ہوئے اس امید کا اظہار کیا ہے کہ وزیر اعظم معیشت میں حصہ ڈالنے والے اسٹیک ہولڈرز سے مشاورت کی روایت ڈالیںگے ،موجودہ حالات میں مینو فیکچررز اور ایکسپورٹرز شدید مشکلات سے دوچار ہیں جس کی وجہ سے نہ صرف بیروزگاری میں اضافہ ہو رہا ہے بلکہ ایکسپورٹ بھی تنزلی کا شکار ہے اور موجودہ حالات میں پاکستان اس تسلسل کا متحمل نہیں ہو سکتا ۔

ان خیالات کا اظہار ایسوسی ایشن کے سینئر وائس چیئرمین عثمان اشرف ، کارپٹ ٹریننگ انسٹی ٹیوٹ کے چیئر پرسن اعجاز الرحمان، سینئر مرکزی رہنما عبد اللطیف ملک، ریاض احمد، میجر (ر) اختر نذیر، شاہد حسن شیخ اور سعید خان نے اپنے مشترکہ بیان میں کیا ۔ انہوں نے کہا کہ حکومت اس سے آگاہ ہے کہ ایکسپورٹ میں اضافے کے بغیر ملک کے معاشی مسائل حل نہیں ہو سکتے لیکن اس کے باوجود ایکسپورٹرز کو اس طرز پر سہولتیں اور مراعات میسر نہیں جو ہمسائے یا دنیا کے دیگر ممالک کو حاصل ہیں ۔

انہوں نے کہا کہ ہاتھ سے بنے قالینوں کی صنعت لاکھوں لوگوں کو روزگار کی فراہمی کا ذریعہ ہے لیکن حکومت کی سرپرستی نہ ہونے کی وجہ سے ہماری مشکلات دن بدن بڑ ھ رہی ہیں جس کے منفی اثرات ایکسپورٹ میں کمی کی صورت میں سامنے آرہے ہیں،ایف بی آر کے کئی ایس آر اوز ہمارے لئے مشکلات کا باعث ہیں ،مطالبہ ہے کہ رجسٹرڈ مینو فیکچررز کی طرز پر کمرشل امپورٹرز کو بھی کسٹمز ڈیوٹیز میں ریلیف ملنا چاہیے تاکہ پیداواری لاگت کنٹرول میں رہنے کے باعث ہم عالمی منڈیوں میں مقابلے کی دوڑ میںشامل رہ سکیں۔

انہوں نے کہا کہ ہم امید کرتے ہیں کہ وزیر اعظم شہباز شریف اور ان کی معاشی ٹیم برآمدات میں حصہ ڈالنے والے تمام شعبوں سے رابطوں کا آغاز کرے گی اور ان کے مسائل کے حل کیلئے عملی پیشرفت کی جائے گی ۔ایسوسی ایشن آئندہ مالی سال کے بجٹ کے حوالے س اپنی تجاویز بھی تیار کر رہی ہے جس کا ڈرافٹ وزیرا عظم ،تمام متعلقہ وزارتوں اور ایف بی آر کو ارسال کیا جائے گا ۔ ہم یہ بھی امید رکھتے ہیں کہ وزیر اعظم شہباز شریف اپنی معاشی ٹیم کے ہمراہ جلد ایکسپورٹرز کی ایسوسی ایشنز سے ملاقاتیں کر کے ان کے مسائل سے آگاہی حاصل کریں گے۔