مریم نواز اپنی پارٹی کی خدمت کی میراث کو لے کر آگے بڑھیں گی‘ سیف الملوک کھوکھر

سابق کمشنر کے وضاحتی بیان کے بعد تحریک انتشار کی منصوبہ بندی عیاں ہو گئی ‘ صدر مسلم لیگ (ن)

لاہور( رپو ر ٹر )پاکستان مسلم لیگ (ن) لاہور کے صدر و رکن قومی اسمبلی سیف الملوک کھوکھر نے کہا ہے کہ نامزد وزیر اعلی پنجاب مریم نواز کی جانب سے عوام کی فلاح و بہبود اور صوبے کی ترقی کیلئے واضح ترجیحات کا اعلان اس بات کا ثبوت ہے کہ وہ پارٹی قائد نواز شریف اور صدر شہباز شریف کی خدمت کی میراث کو لے کر آگے بڑھیں گی ، مسلم لیگ (ن) کے قائد نواز شریف کی سربراہی میں نامزد وزیر اعلی مریم نواز گزشتہ کئی روز سے پنجاب کو گزشتہ حکومت کی بد حالی کے دور سے باہر نکالنے کیلئے منصوبہ بندی میں مصروف ہیں ۔

اپنے دفتر میں حلقے کی عوام سے گفتگو کرتے ہوئے سیف الملوک کھوکھر نے کہا کہ پاکستان مسلم لیگ (ن) ترقی کی ضامن جماعت ہے اور ان شا اللہ آئندہ پانچ سالوں میں اسے ایک بار پھر ثابت کریں گے۔ انہوں نے کہا کہ اس میں کوئی شک نہیں کہ مسلم لیگ (ن) انتہائی مشکل اور کڑے حالات میں وفاق او رپنجاب میں حکومتیں سنبھالنے جارہی ہے لیکن ہماری قیادت نیک نیت ہے ،

اس لئے ہمارا خدا کی ذات پر مکمل بھروسہ ہے کہ ملک کی ہچکولے کھاتی نائو ضرور پار لگے گی ۔ انہوں نے کہا کہ تحریک انتشار آج بھی ملک کے استحکام کے ساتھ کھلواڑ کرنے میں مصروف ہے اور اس کیلئے طرح طرح کی سازشیں کی جارہی ہیں ، سابق کمشنر راولپنڈی کے وضاحتی بیان کے بعد تحریک انتشار کی ملک میں ہیجان اور افرا تفری پھیلانے کی ساری منصوبہ بندی عیاں ہو گئی ہے ۔

انہوں نے کہا کہ تمام سیاسی جماعتوں سے اپیل ہے کہ وہ ملک میں سیاسی استحکام کیلئے کردار ادا کریں کیونکہ ملک کا معاشی استحکام سیاسی استحکام سے جڑا ہوا ہے ، اگر سیاسی جماعتوں نے ہوش کے ناخن نہ لئے تو سوائے پچھتاوے کے کچھ ہاتھ نہیں آئے گا۔