بانی تحریک انصاف نے سائفر کیس اور توشہ خانے ریفرنس کی سزا کے خلاف اسلام آباد ہائیکورٹ سے رجوع کر لیا

مقدمات میں انصاف کے تقاضوں کوپس پشت ڈال دیاگیاہے شفاف ٹرائل کی آئین وقانون ضمانت دیتا ہے اس کی بھی خلاف ورزی کی گئی ہے، درخواست میں موقف

اسلام آباد (کو رٹ رپو ر ٹر ) بانی تحریک انصاف نے سائفر کیس اور توشہ خانے ریفرنس کی سزا کے خلاف اسلام آباد ہائیکورٹ سے رجوع کر لیا۔سردار لطیف کھوسہ کی وساطت سے اسلام آباد ہائیکورٹ میں اپیلیں دائر کی گئیں۔اپیلوں میں ماتحت عدالت سمیت نیب ایف آئی اے کو فریق بناتے ہوئے موقف اختیار کیا گیاہے کہ مقدمات میں انصاف کے تقاضوں کوپس پشت ڈال دیاگیاہے شفاف ٹرائل کی آئین وقانون ضمانت دیتا ہے اس کی بھی خلاف ورزی کی گئی ہے۔

جلدبازی میں گواہوں پرجرح تک کرنے کی اجازت نہیں دی گئی۔سناتک نہیں گیا۔سرکاری وکیل مقرر کرکے اوران سے اپنی مرضی کے دلائل حاصل کیے گئے ھمیں وکلاء پیش کرنے کی اجازت تک نہیں دی گئی۔اس لیے ان سزاؤں کو کالعدم قرار دیتے ہوئے بانی پی ٹی آئی اور بشریٰ بی بی کورہاکیا جائے۔

اس موقع پر لطیف کھوسہ نے میڈیاکوبتایاکہ سزا معطلی اور اپیلوں کی جلد سماعت کیلئے متفرق درخواستیں بھی دائر کی ہیں، چیف جسٹس سے اپیل ہے کہ ان درخواستوں کو جلد سماعت کیلئے مقرر کریں جبکہ عدت کیس کی اپیل سیشن کورٹ میں دائر کی ہے۔واضح رہے کہ آفیشل سیکرٹ ایکٹ عدالت نے بانی پی ٹی آئی کو سائفر کیس میں 30 جنوری کو سزا سنائی جبکہ احتساب عدالت نے بانی پی ٹی آئی اور بشریٰ بی بی کو توشہ خانہ کیس میں 31 جنوری کو سزا سنائی تھی۔

احتساب عدالت نے عمران خان اور ان کی اہلیہ بشریٰ بی بی کو توشہ خانہ ریفرینس میں 14، 14 سال قید کی سزا سنانے کے ساتھ ساتھ عمران خان کو 10 برس کے لیے نااہل بھی کر دیا۔ جبکہ سیکرٹ ایکٹ کے تحت قائم خصوصی عدالت نے سائفرگمشدگی کیس میں عمران خان اور ان کی جماعت کے سینیئر رہنما شاہ محمود قریشی کو دس دس برس قید کی سزا سنائی تھی۔

ان دونوں مقدمات میں جہاں عمران خان کو دی جانے والی سزا کی شدت پر بات ہو رہی ہے وہیں یہ بحث بھی چھڑ گئی ہے کہ عمران خان اور شریک ملزمان کو عدالتی کارروائی کے دوران اپنے دفاع کا مکمل موقع نہیں ملا۔ اور ان مقدموں کے فیصلوں میں قانونی سقم موجود ہیں۔پاکستان تحریکِ انصاف نے فیصلوں پر تحفظات کا اظہار کرتے ہوئے کہا تھا کہ سائفر کیس میں عمران خان اور شاہ محمود قریشی کو مقدمے کے اختتامی مراحل میں اپنی مرضی کے وکلا سے مدد لینے کی اجازت نہیں دی گئی اور عدالت نے ملزمان کی طرف سے ان مقدمات کی پیروی کے لیے سرکاری وکیل مقرر کر دیے۔#