مریم نواز دو تہائی اکثریت سے وزیر اعلیٰ منتخب ہوں گے‘ عظمیٰ بخاری

پنجاب کابینہ بہت بڑی نہیں ہوگی‘ سیکرٹری اطلاعات کی پنجاب اسمبلی میں گفتگو

لاہور( رپو ر ٹر )پاکستان مسلم لیگ (ن) پنجاب کی سیکرٹری اطلاعات عظمی بخاری نے کہا ہے کہ مریم نواز دوتہائی اکثریت سے وزیراعلی پنجاب منتخب ہوں گی،مریم نواز پاکستان کی پہلی خاتون وزیراعلی پنجاب ہوں گی، مسلم لیگ (ن)صرف خاتون کو بااختیار بنانے کی بات نہیں کرتی جس خاتون میں آگے بڑھنے کی صلاحیت ہوتی ہے اس کو موقع فراہم کرتی ہے۔

پنجاب اسمبلی کے احاطے میں میڈیا سے گفتگو کرتے ہوئے عظمی بخاری نے کہا کہ مریم نواز مشکل وقت میں پارٹی کے ساتھ کھڑی ہوئیں، انہوں نے ظالم کے سامنے کلمہ حق بیان کیا، مریم اپنی قابلیت پر دو تہائی اکثریت کے ساتھ پنجاب اسمبلی سے وزیراعلی پنجاب منتخب ہوں گی۔

انہوں نے کہا کہ مریم نواز وزیر اعلیٰ منتخب ہونے کے بعد اپنی پہلی تقریر میں آگے کے لائحہ عمل کے بارے آگاہ کریں گی، کابینہ بہت بڑی نہیں ہوگی، مریم نواز کا سادہ سا روڈ میپ ہے، آپ گورننس کا ایک اچھا روڈ میپ دیکھیں گے۔