جنرل ساحر شمشاد مرزا کا قطر کا دورہ، امن و استحکام کے لیے مشترکہ عزم کا اعادہ

راولپنڈی: چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے قطر کا دورہ کیا جہاں انہوں نے اعلیٰ سطح کی ملٹری کوآپریشن کمیٹی کے اجلاس کے دوسرے دور میں شرکت کی۔پاک فوج کے شعبہ تعلقات عامہ کے مطابق جنرل ساحر شمشاد مرزا نے قطر کے نائب وزیراعظم اور وزیر دفاع شیخ سعود بن عبدالرحمن اور قطری مسلح افواج کے چیف آف اسٹاف لیفٹیننٹ جنرل جاسم محمد احمد المنال سے ملاقات کی۔ان ملاقاتوں کے دوران دونوں فریقین نے خطے میں بدلتی ہوئی سلامتی کی صورتحال پر تبادلہ خیال کیا اور علاقائی اور عالمی سطح پر امن و استحکام کے لیے اپنے مشترکہ عزم کا اعادہ کیا۔چیئرمین جوائنٹ چیفس آف اسٹاف کمیٹی نے پاکستان اور قطر کے درمیان تاریخی برادرانہ تعلقات پر روشنی ڈالی اور دفاع اور سیکیورٹی کے شعبوں میں مستقبل میں تعاون کے امکانات پر تبادلہ خیال کیا جو کہ اعلیٰ سطحی فوجی تعاون کمیٹی کے دائرہ کار میں آتا ہے۔قطر کی سول اور عسکری قیادت نے خطے میں استحکام کو یقینی بنانے میں پاکستان کے کلیدی اور ذمہ دارانہ کردار کو سراہا اور دہشت گردی کے خلاف جنگ میں پاکستانی مسلح افواج کی پیشہ وارانہ مہارت اور قربانیوں کو خراج تحسین پیش کیا۔قبل ازیں قطری مسلح افواج کے ہیڈ کوارٹرز پہنچنے پر چیئرمین جوائنٹ چیفس آف اسٹاف کمیٹی کو چاق و چوبند فوجی دستے نے گارڈ آف آنر پیش کیا۔