بھارت نے بلوچستان میں خفیہ مداخلت بڑھا دی،بین الاقوامی جریدہ

اسلام آباد: پاکستان کی متوازن خارجہ پالیسی اور موثر فوجی سفارت کاری عالمی افق پر کامیابیوں کی نوید بن گئی ہے، عالمی منظر نامے میں پاکستان کی بڑھتی ہوئی اہمیت پر بین الاقوامی جریدے دی ڈپلومیٹ کی رپورٹ منظر عام پر آئی ہے۔ بین الاقوامی جریدے دی ڈپلومیٹ کے مطابق امریکی ترجیحات میں تبدیلی آئی ہے اور اس کا جھکاؤ بھارت کے بجائے پاکستان کی طرف واضح ہے۔ پاکستان امریکہ کے لیے جنوبی ایشیا اور مشرق وسطیٰ میں اہم کردار ادا کرتا ہے۔ حالیہ پاک بھارت تنازع نے فوجی طاقت کے حوالے سے امریکہ کے اندازوں کو بھی یکسر تبدیل کر دیا ہے۔ ڈپلومیٹ نے لکھا کہ بدلتے ہوئے حالات کے پیش نظر بھارت کے لیے نیٹ سیکیورٹی فراہم کرنے والے کا کردار ادا کرنا مشکل نظر آتا ہے۔ پاک امریکہ تعلقات کی ترقی سے مشترکہ مفادات کی ہم آہنگی میں مزید بہتری آئی ہے۔ امریکہ اب بھارت کو جنوبی ایشیا میں متبادل پارٹنر کے طور پر نہیں دیکھا جا رہا، امریکی ترجیحات میں تبدیلی بھارت کے لیے باعث تشویش ہے۔ بین الاقوامی جریدے نے لکھا کہ بھارت گزشتہ کئی سالوں سے امریکی ترجیحات میں شامل تھا لیکن اب وہ دور ختم ہو چکا ہے۔ پاکستان بھارت کے ساتھ تعلقات بہتر کرنے پر آمادگی ظاہر کرتا رہا ہے۔ پاکستان کے مطابق بھارت کی طرف سے امن کی پیشکش پر ردعمل نے ہمیشہ کشیدگی میں اضافہ کیا ہے۔ بھارت نے بلوچستان میں خفیہ مداخلت بڑھا دی ہے اور بلوچستان میں ٹارگٹ کلنگ کی مہم شروع کر دی ہے۔ جریدے کے مطابق مئی 2025 میں پاک بھارت تنازع نے ایٹمی تصادم کا خدشہ بڑھا دیا تھا تاہم امریکا نے پاک بھارت جنگ بندی میں کردار ادا کیا۔ بھارت کا مذاکرات سے مسلسل انکار امریکہ کے ساتھ تعلقات میں مستقل غیر یقینی اور بگاڑ پیدا کر رہا ہے۔