حماد اظہر،فرخ حبیب،مراد سعید،علی امین گنڈاپور،عندلیب عباس ،اعظم سواتی کی جائیداد قرق کی جائینگی
انسداد دہشت گردی عدالت لاہور نے اشتہاری ملزمان کی منقولہ و غیرمنقولہ جائیدادیں قرق کرنے کا حکم دیا
لاہور(کرائم رپو رٹر) پاکستان تحریک انصاف کے اشتہاری رہنماوں کی جائیدادیں قرق کرنے کا حکم دے دیا گیا۔لاہور کی انسداد دہشت گردیعدالت کی جانب سے پی ٹی آئی سے تعلق رکھنے والے اشتہاری ملزمان کی منقولہ اور غیرمنقولہ جائیدادیں قرق کرنے کا حکم دیا گیا ہے، جس کے تحت پنجاب کے سابق صوبائی وزیر میاں اسلم اقبال کے 2 رہائشی پلاٹس اور ایک بینک اکاونٹ، سابق وفاقی وزیر حماد اظہر کی پانچ زرعی زمینیں اور فرخ حبیب کے 4 بینک اکاونٹس، ایک رہائشی جائیداد اور ایک بیمہ پالیسی قرق کی جائے گی۔بتایا گیا ہے کہ مراد سعید کے 2 بینک اکاونٹس اور ایک گاڑی، علی امین گنڈاپور کی 3 زرعی زمینیں، ایک رہائشی جائیداد، 5 بینک اکاونٹ، 2 گاڑیاں اور 35 گھوڑے قرق کرنے کا حکم دیا گیا ہے، عندلیب عباس کی 2 رہائشی جائیدادیں، 3
بینک اکاونٹس اور 2 گاڑیاں قرق کی جائیں گی جب کہ سابق وفاقی وزیر اعظم سواتی کی 2 زرعی زمینیں، 2 رہائشی جائیدادیں، 5 بینک اکاونٹس، ایک گاڑی، 3 پلاٹ، فلیٹ، سواتی انٹرپرائزز میں 51 فیصد شیئرز، امریکہ و دبئی کی جائیدادیں بھی قرق کرنے کا حکم دیا گیا۔اسی طرح 9 مئی واقعات کے مقدموں میں بھی علی امین گنڈا پور سمیت اشتہاری نومنتخب ارکان اسمبلی کی گرفتاری کا فیصلہ کیا ہے، الیکشن میں کامیاب ہونے والے امیدوار میاں اسلم اقبال، علی امین گنڈا پور اور امتیازشیخ نو مئی کے واقعات میں لاہور پولیس کو مطلوب ہیں اور اب عام انتخابات 2024 میں رکن اسمبلی منتخب ہونے والے 9 مئی کے اشتہاریوں کی گرفتاری کے لیے حکمت عملی تشکیل دیدی گئی ہے۔
معلوم ہوا ہے کہ مقدمات میں ملوث 22 اشتہاری رہنما 282 کارکن تاحال انتہائی مطلوب ہیں، حالیہ الیکشن کے کامیاب امیدوار میاں اسلم اقبال، علی امین گنڈا پو، امتیاز شیخ نو مئی کے واقعات میں لاہور پولیس کو مطلوب ہیں، عدالت کی جانب سے انہیں اشتہاری قرار دیا گیا تھا، اشتہاریوں کے روابط کا تعین کرنے کے لیے جیوفینسنگ، موبائل ٹریکنگ اور آئی پی ایڈریس ٹریک کر لیے گئے ہیں، انتخابات میں سیٹ حاصل کرنے والے اشتہاریوں کی گرفتاری قانون کے مطابق ہوگی، ملزمان انتخابی مہم اور نتائج کے دوران مسلسل کارکنوں سے رابطے میں رہے، اشتہاریوں کی لوکیشن معلوم کرنے کے لیے ایف آئی اے اور دیگر اداروں کی مدد لی جارہی ہے۔
Leave a Comment