پنجاب: اسموگ بڑھنے کی اصل وجوہات جاننے کیلئے عالمی معاونین سے تحقیق کرانے کا فیصلہ

محسن نقوی نے سڑکوں کو دھونے کے لیے ٹیموں کی تعداد میں اضافے کی ہدایت دی—فائل فوٹو: اے ایف پی

پنجاب میں اسموگ میں کمی لانے کے لیے مصنوعی بارش کے بعد نگران وزیراعلیٰ پنجاب محسن نقوی نے ایک اور اہم قدم اٹھاتے ہوئے عالمی معاونین سے اسموگ بڑھنےکی اصل وجوہات کی تحقیقات کرانے کا فیصلہ کرلیا۔

اہور میں وزیر علیٰ پنجاب محسن نقوی کی زیر صدارت کابینہ کمیٹی برائے انسداد اسموگ کا اجلاس منعقد ہوا، اجلاس کے شرکا کو بتایا گیا کہ چین کے ماہرین ماحولیات کی خصوصی ٹیم اگلے ہفتے لاہور آئے گی۔محسن نقوی نے کہا کہ افسوس کی بات ہے کہ ہمارے پاس اسموگ بڑھنے کی وجوہات کی مستند ریسرچ ہی نہیں ہے، ہم صرف سنی سنائی باتوں اور قیاس آرائیوں کے ذریعے اسموگ پر قابو نہیں پا سکتے۔

انہوں نے کہا کہ عوام کی صحت کےتحفظ کے لیے مستند ڈیٹا سے ہی اسموگ سے نمٹنے کے لیے جامع اقدامات کئے جا سکتے ہیں، عوام سے اپیل ہے کہ وہ ماسک لازمی پہنیں تاکہ بیماریوں سے محفوظ رہ سکیں۔